Kreu i Lëvizjes Vetëvendosje, Albin Kurti, ka folur pas mbledhjes së Grupit Parlamentar të Lëvizjes Vetëvendosje, ku është edhe diskutuar situata e krijuar pas vendimit të gjashtë deputetëve të LDK-së për të mos e mbështetur kandidaturën e Bekim Sejdiut për president të Kosovës.
Kurti, para gazetarëve, u shpreh se procesi negociator me LDK-në dhe marrëveshja për kandidatin e përbashkët janë mirëpritur nga deputetët e Vetëvendosjes, duke theksuar se mbështetja për Sejdiun ka qenë e plotë brenda grupit parlamentar të VV-së, njofton Dukagjini.
Ai ka thënë se në mbledhjen e grupit parlamentar ka pasur mbështetje të plotë për Sejdiun, ndërsa ka vlerësuar si shpresëdhënës qëndrimin e Kryesisë së LDK-së për ta mbështetur kandidaturën e tij.
“Të gjithë e mirëpritën procesin negociator me Lidhjen Demoraktike të Kosovës dhe marrëveshjen që kemi arritur me emrin e përveçëm të kandidati të përbashkët, konsensual, me atributet e larta në aspektin vlerore të kontributit të profesorit, Bekim Sejdiu. Unë isha shumë i lumtur që mbështetja ishte e plotë nga të gjithë deputetët e grupit tonë parlamentar për profesor, Bekim Sejdiu, si president i ardhshëm i Republikës së Kosovës. Natyrisht që kjo mbledhje ishte në dijeni të zhvillimeve të orëve të fundit ku në njërën anë ishte shpresë dhënës qëndrimi i kryesisë së Lidhjes Demokratike të Kosovës për mbështetje të plotë për profesor, Bekim Sejdiun, si një emër për të cilën u pajtuam të dy subjektet politike”, u shpreh Kurti.
Megjithatë, Kurti u shpreh se situata ndryshoi pas njoftimit se gjashtë nga 18 deputetët e LDK-së nuk do ta mbështesin Sejdiun.
Kreu i ekzekutivit në detyrë ka kritikuar ashpër qëndrimin e gjashtë deputetëve të LDK-së, duke thënë se deputetët e VV-së e edhe vetë e konsiderojnë një sjellje të tillë si të papërgjegjshme, të dëmshme dhe absurde.
“Mirëpo, më pas patëm edhe këtë njoftimin negativ që 6 deputetë nga 18 sa i ka grupi parlamentar i LDK-së nuk e mbështesin për president të Republikës. Kjo është një situatë e re që kërkon që në njërën anë të takohemi përseri me kryetarin e LDK-së .. për bindjen time të gjithë deputetëve që ishin sonte të pranishëm për 53 sosh e konsiderojmë të papërgjegjshme, të dëmshme dhe absurde një sjellje të tillë të këtyre 6 deputetëve ku pas tri palë zgjedhjeve duket që ka dëshirë e vullnet që të shkojmë edhe në zgjedhjet e katërta për dy vjet. Me keqardhje na duhet të themi që marrëveshjen politike që e arritëm me aq shumë mund. E falënderoj ekipin negociues të LDK-së. Është një lajm i mirë për skenën politike në Kosovë”,”, u shpreh Kurti.
