Sekretari i Përgjithshëm i NATO-s, Mark Rutte, ka deklaruar se aleanca është plotësisht në krah të Gjermanisë pas incidentit të 14 gushtit në Leipzig, të cilin ai e ka cilësuar si një sulm hibrid të lidhur me Rusinë.
Rutte bëri të ditur në rrjetin social X se kishte zhvilluar një bisedë me kancelarin gjerman Friedrich Merz, gjatë së cilës diskutuan zhvillimet e fundit dhe reagimin e Berlinit ndaj incidentit.
“NATO qëndron në solidaritet të plotë me Gjermaninë pas sulmit hibrid rus në Leipzig më 14 gusht. Provat janë të qarta”, deklaroi Rutte, ndërsa përshëndeti masat e ndërmarra nga autoritetet gjermane.
Sipas tij, NATO do të vazhdojë të rrisë kapacitetet për të parandaluar kërcënimet dhe për të mbrojtur vendet anëtare nga veprimet armiqësore.
Ai përmendi veçanërisht incidentet e fundit në Leipzig, por edhe raste të tjera të ngjashme të raportuara në territorin e aleancës.
Rutte theksoi gjithashtu se përpjekjet e Moskës për të krijuar frikë, për të dobësuar unitetin e vendeve të NATO-s dhe për të penguar mbështetjen ndaj Ukrainës nuk do të arrijnë qëllimin e tyre.
Ai përsëriti se mbështetja e NATO-s për Ukrainën mbetet e pandryshuar, ndërsa angazhimi për mbrojtjen kolektive të vendeve anëtare vazhdon të jetë një nga prioritetet kryesore të aleancës.
Ndërkohë, autoritetet gjermane kanë dhënë detaje të reja lidhur me incidentin në aeroportin e Leipzigut. Sipas raportimeve të mediave, tentativa për të goditur një avion ukrainas të transportit të tipit Antonov ishte më serioze nga sa ishte bërë e ditur fillimisht.
Një nga dronët e përdorur dyshohet se kishte lëndë shpërthyese, ndërsa hetimet kanë ngritur dyshime se në operacion mund të kenë marrë pjesë disa mjete ajrore pa pilot.
Situata është bërë edhe më shqetësuese pas raportimeve të Welt am Sonntag për zbulimin e armëve të fshehura në afërsi të Berlinit.
Sipas vlerësimit të shërbimit gjerman të inteligjencës së brendshme BfV, armët mund të kenë qenë të destinuara për persona të lidhur me spiunazhin rus dhe për operacione të mundshme të dhunshme.
Deri tani, Ambasada ruse në Berlin nuk ka dhënë një reagim zyrtar për këto akuza. Moska ka mohuar në raste të mëparshme përfshirjen në operacione sabotimi, spiunazhi apo atentatesh në vendet perëndimore, duke i konsideruar akuzat si pjesë të një fushate antiruse. /tvklan.al
The post NATO në krah të Gjermanisë pas “sulmit hibrid” në Leipzig appeared first on Gazeta Express.
