Irani ka lëshuar raketa drejt disa objektivave në Jordani, përfshirë bazën ajrore Muwaffaq Salti, ku janë të dislokuara forca amerikane.
Gjatë natës ndërmjet së dielës dhe së hënës, raketa u drejtuan edhe nga zona e Akabës, ndërsa mediat lokale raportuan për shpërthime në disa pjesë të Jordanisë.
Një zyrtar amerikan deklaroi se deri më tani nuk janë evidentuar dëme të konsiderueshme dhe se pothuajse të gjitha raketat e drejtuara ndaj objektivave amerikane janë interceptuar.
Ushtria jordaneze njoftoi se kishte rrëzuar tetë raketa që kishin hyrë në hapësirën ajrore të vendit.
Sulmi iranian dyshohet se ishte kundërpërgjigje ndaj operacionit amerikan në ishullin Larak. Teherani pretendon se aty u goditën dy raketahedhës të Gardës Revolucionare të Iranit.
Komanda Qendrore Amerikane deklaroi se kishte ndërmarrë një veprim “të kufizuar dhe të saktë” ndaj mjeteve të Gardës Revolucionare, të cilat, sipas saj, përbënin kërcënim të menjëhershëm në Ngushticën e Hormuzit.
Disa orë më vonë, Garda Revolucionare njoftoi se një supertanker ishte përfshirë nga zjarri pasi kishte goditur dy mina detare. Ajo mori përgjegjësinë edhe për një sulm me dronë ndaj bazës ajrore Al Minhad në Emiratet e Bashkuara Arabe, ku ndodhen trupa dhe helikopterë amerikanë.
Këto zhvillime shënojnë një përshkallëzim të ri të tensioneve ndërmjet Iranit dhe Shteteve të Bashkuara, me përplasjet që tashmë janë shtrirë edhe në territorin e vendeve të tjera të rajonit.
The post Irani lëshon raketa drejt bazës amerikane në Jordani, tetë prej tyre interceptohen appeared first on Gazeta Express.
