Veprimtari Ibrahim Kelmendi ka rrëfyer detaje për organizimin e grupeve ilegale shqiptare dhe demonstratat e vitit 1981.
Në Debat Plus, në kuadër të emisioneve ekskluzive “Dosjet”, duke folur për raportet mes organizatave të atëhershme, Kelmendi tha se më 5 prill 1981 ishte marrë vesh me Kadri Zekën, i njohur në atë kohë me nofkën “Zeqa”, për bashkërendimin e veprimtarisë në organizimin e protestave dhe tubimeve informuese.
Sipas tij, pas një serie demonstratash të zhvilluara çdo fundjavë nga 11 prilli deri në mesin e qershorit 1981, ishte diskutuar edhe bashkimi i tri organizatave – Lëvizjes Nacionalçlirimtare të Kosovës dhe Viseve Shqiptare (LNÇKVSHJ), Organizatës Marksiste-Leniniste të Kosovës (OMLK) dhe Frontit të Kuq Popullor (FKP).
Kelmendi tha se tri organizatat kishin bashkëpunuar në terren, ndërsa kishin ndihmuar njëra-tjetrën në botimin dhe shpërndarjen e organeve të tyre, përfshirë “Bashkimi”, “Liria”, “Zëri i Kosovës” dhe “Lajmëtari i Lirisë”.
“Ne tre, të afirmuar si udhëheqës të organizatave tona në Perëndim, e bashkuam veprimtarinë edhe në terren, pos që e kishim bashkuar edhe në propagandë”, ka deklaruar Kelmendi.
Ai tha se marrëveshja për bashkimin e organizatave, për të cilën sipas tij ishte arritur dakordim në korrik të vitit 1981, u pengua disa muaj më vonë.
“Bashkimi i organizatave, për të cilin qemë dakorduar qysh në korrik 1981, u komplotua në takimin e tetorit 1981, në Turqi, nga Sabri Novosella”, tha Kelmendi.
Sipas rrëfimit të tij, më 14 tetor 1981 Novosella kishte zhvilluar takim me Kadri Zekën, ndërsa të pranishëm kishin qenë edhe Bardhosh Gërvalla dhe diplomati Bujar Hoxha.
Kelmendi foli edhe për bashkëpunimin me organizatat e tjera ilegale të asaj kohe. Ai tha se në atë periudhë kishin pasur kontakte me Grupin Komunist të Riza Salihut dhe Besëlidhjen Shqiptare të Emin Fazlisë, ndërsa me organizatat e tjera nuk kishin pasur bashkëpunim.
Kthimi në Kosovë dhe takimi me Bajrush Xhemajlin
Në intervistë, Kelmendi tregoi edhe për një vizitë të tij në Kosovë gjatë verës së vitit 1979.
Ai mohoi se ishte kthyer në mënyrë të fshehtë, duke thënë se kishte udhëtuar legalisht, pasi ishte detyruar të kthehej për shkak të gjendjes së rëndë shëndetësore të një të afërmeje.
Gjatë qëndrimit në Kosovë, sipas tij, bashkëveprimtari Malush Ademaj e kishte dërguar për të takuar Bajrush Xhemajlin në Komogllavë të Ferizajt.
Kelmendi: Demonstratat e vitit 1981 nuk i planifikoi asnjë organizatë
I pyetur nëse demonstratat e vitit 1981 ishin organizuar apo urdhëruar politikisht nga ndonjë organizatë, përfshirë Sigurimin e Shtetit shqiptar, Kelmendi e mohoi një gjë të tillë.
“Jo, shteti shqiptar dhe ne jemi befasuar për demonstratë”, deklaroi ai.
Kelmendi tha se disa muaj pas demonstratave kishte takuar Abdullah Tahirin, të cilin e përshkroi si një nga protagonistët e demonstratave dhe që më vonë ishte shpallur Hero i Kosovës.
Sipas Kelmendit, Tahiri i kishte treguar se si kishin nisur protestat dhe se ato nuk ishin rezultat i ndonjë plani të organizatave ilegale.
“E pata lut t’i rrëfente edhe me shkrim. Fatkeqësisht m’i kanë vjedh ato dhe materiale e mija që i ruaja në banesë. Nga ai u informova se ishin demonstrata aksidentale, të paplanifikuara nga asnjë organizatë, as nga asnjë agjenturë”, tha Kelmendi.
