Presidenti Donald Trump urdhëroi të martën që flamujt amerikanë të ulen në gjysmështizë në të gjithë Shtetet e Bashkuara për një javë, ndërsa shprehu pikëllimin për ndarjen nga jeta të ikonës së muzikës country, Dolly Parton, duke i thënë këngëtares legjendare: “Bota të do.”, raportojnë mediat e huaja.
Parton ndërroi jetë paqësisht të martën në Nashville, Tennessee, sipas një njoftimi të bërë publik nga përfaqësuesit e saj.
Ajo ishte 80 vjeçe.
“Me shumë trishtim njoftoj se Dolly Parton, një nga këngëtaret më të mëdha të muzikës country dhe shumë më tepër se kaq, ka ndërruar jetë,” shkroi Trump në Truth Social.
“Kjo është një humbje e vërtetë për miliona njerëz. Nuk ka pasur kurrë askënd si ajo dhe nuk do të ketë më.”
Më pas, Trump njoftoi një homazh presidencial për Parton.
“Në nder të saj, po urdhëroj uljen e flamurit amerikan në të gjithë Shtetet e Bashkuara për një periudhë prej një jave, duke filluar sonte në orën 18:00,” shkroi Trump. “Pusho në paqe, Dolly! Bota të do.”
Homazhi i Trump erdhi në një kohë kur familja dhe përfaqësuesit e Parton kujtuan një grua, ndikimi i së cilës shkonte shumë përtej skenave të muzikës country që e bënë të famshme.
“Një jetë e shkëlqyer, që ndriçoi aq fort sa të shihej nga e gjithë bota, Dolly do të mbetet përgjithmonë një frymëzim jo vetëm përmes muzikës së saj të pavdekshme dhe këngëve të shumta që shkroi, por edhe përmes zgjuarsisë, ngrohtësisë dhe mirësisë së saj, që na bënë të gjithëve të ndihemi si pjesë e familjes,” thuhej në njoftim. “Trashëgimia e Dolly Parton është një trashëgimi dashurie, dhembshurie dhe qëndrueshmërie.”
Parton, e lindur më 19 janar 1946, pati një karrierë shtatëdekadëshe që përfshiu muzikën, shkrimin e këngëve, aktrimin, letërsinë dhe filantropinë.
Me kërkesë të Parton, do të zhvillohet një ceremoni e vogël dhe private vetëm për familjarët e afërt.
Fansat dhe miqtë u inkurajuan të shprehin homazhet e tyre në rrjetet sociale ose përmes faqes zyrtare të Parton.
Në vend të luleve, familja kërkoi që donacionet të bëhen për Dolly Parton’s Imagination Library.
Bryan Seaver, nipi i Parton dhe përgjegjësi i saj i sigurisë, publikoi gjithashtu një video-mesazh pas vdekjes së saj.
Homazhet nisën të vërshonin menjëherë nga Tennessee dhe nga mbarë vendi.
Senatorja Marsha Blackburn, republikane nga Tennessee, shkroi në X: “Nuk ka fjalë që mund të shprehin në mënyrë adekuate dhimbjen që familja jonë dhe të gjithë banorët e Tennessee ndiejnë nga humbja e Dolly Parton. Një lidere ikonike që e donte shtetin dhe kombin tonë të madh. Vdekja e saj lë pas një boshllëk që askush nuk mund ta mbushë. Dolly, do të të duam gjithmonë.”
Republikanët në Dhomën e Përfaqësuesve e quajtën Parton “një ikonë amerikane” dhe “një thesar kombëtar”, duke e vlerësuar si “një artiste legjendare, një filantrope bujare dhe një bijë krenare të Tennessee-t, muzika dhe shpirti i së cilës prekën breza amerikanësh”.
Republikani Tim Burchett e kujtoi Parton si “një banore të jashtëzakonshme të East Tennessee”, e cila “nuk e ndryshoi kurrë theksin e saj dhe nuk harroi kurrë nga vinte”.
Guvernatori i Texasit, Greg Abbott, njoftoi gjithashtu se shteti i tij do t’i ulte flamujt në nder të Parton.
“Është shumë e trishtueshme të humbasësh këtë legjendë,” shkroi Abbott në X. “Texas do t’i ulë flamujt në nder të saj. Zoti e bekoftë Dolly-n.”
Kryetari i Dhomës së Përfaqësuesve, Mike Johnson, tha se “Amerika ka humbur një thesar të vërtetë kombëtar”, duke vënë në dukje rrënjët e Parton në Tennessee, suksesin e saj mbarëbotëror dhe aktivitetin e saj filantropik.
“Zëri i pagabueshëm i Dolly Parton, shpirti i saj plot gëzim dhe bujaria e jashtëzakonshme prekën breza amerikanësh dhe shumë njerëz të tjerë në mbarë botën,” shkroi Johnson.
“Nga malet e Tennessee-t deri në skenat e mbarë botës, ajo nuk harroi kurrë nga vinte dhe përdori suksesin e saj të jashtëzakonshëm për të ndihmuar të panumërt të tjerë.”
Departamenti i Brendshëm i SHBA-së i bëri homazh lidhjes së fortë të Parton me rrënjët e saj në Tennessee dhe me malet Great Smoky Mountains.
“Dolly Parton e çoi me vete kudo muzikën, historitë dhe shpirtin e vendlindjes së saj malore në Tennessee,” tha departamenti.
“Ajo ishte një mbështetëse e përjetshme e Great Smoky Mountains dhe e ndau me krenari dashurinë e saj për to me gjithë botën.”
Edhe Departamenti i Policisë së Franklin shprehu dhimbjen për këngëtaren, duke thënë se “rrënjët dhe zemra e saj ishin gjithmonë të lidhura thellë me Tennessee-n”.
Familja e Parton tha se muzika dhe bujaria që karakterizuan jetën e saj të jashtëzakonshme do të vazhdojnë të jetojnë.
“Këngët e saj do të vazhdojnë të jehojnë te njerëzit e të gjitha moshave,” thuhej në njoftim, “dhe puna e saj filantropike do të ketë një ndikim të qëndrueshëm.”
