Orhan Murtezani ka nisur zyrtarisht detyrën si ambasador dhe përfaqësues i përhershëm i Maqedonisë së Veriut pranë NATO-s. Sipas INA-s, ai bën pjesë në grupin prej nëntë ambasadorësh të rinj, emërimet e të cilëve u miratuan nga Qeveria në shkurt të këtij viti.
Duke folur pas marrjes së postit, Murtezani e cilësoi këtë përgjegjësi si hapjen e një etape të re në rrugëtimin e tij profesional dhe njëkohësisht si vazhdimësi të përkushtimit ndaj një Maqedonie të Veriut të sigurt, e cila mbetet aleate e besueshme në familjen euroatlantike.
Sipas tij, të qenët anëtar i NATO-s nuk është vetëm privilegj, por përfshin edhe detyrime, sidomos në një kohë kur siguria nuk mund të konsiderohet e garantuar.
Nga qershori 2024 deri në dhjetor 2025, Murtezani ushtroi funksionin e ministrit për Çështje Evropiane. Pas zgjedhjeve lokale ai u shkarkua, ndonëse kryeministri Hristijan Mickoski kishte njoftuar më herët se Murtezani do të mbetej pjesë e kabinetit dhe do të ngarkohej me mbikëqyrjen e zbatimit të Agjendës së Reformave.
Në postin e ri, Murtezani do ta përfaqësojë Maqedoninë e Veriut në një nga institucionet më të rëndësishme të sigurisë euroatlantike.
The post Orhan Murtezani nis zyrtarisht mandatin si përfaqësues i Maqedonisë së Veriut në NATO appeared first on Gazeta Express.
