Për 27 vjet, ushtarët e KFOR-it u kujdesën për sigurinë e Urës së Ibrit.
Por, pas afër tri dekadash, këtë përgjegjësi pritet ta marrë gradualisht Policia e Kosovës.
E gjithë kjo në kuadër të një procesi gradual të reduktimit të pranisë së pjesëtarëve të KFOR-it në këtë urë.
Të hënën, në vend të tyre, u panë veturat e Policisë së Kosovës.
Përmes një përgjigjeje për Tëvë 1, misioni i KFOR-it në Kosovë ka bërë të ditur se ka filluar tranzicionin gradual të pranisë së përhershme të KFOR-it nga Ura Kryesore në Mitrovicë.
“ Misioni i KFOR-it të udhëhequr nga NATO ka filluar tranzicionin gradual të pranisë së përhershme të KFOR-it nga Ura Kryesore në Mitrovicë. Në përputhje me përmirësimin e situatës së sigurisë në Kosovë, ky është pjesë e procesit për optimizimin e pozicionimit të KFOR-it. Ky proces do të jetë gradual, i bazuar në kushtet në terren dhe do të koordinohet ngushtë me të gjithë akterët relevantë, përfshirë përfaqësuesit e institucioneve në Kosovë dhe të organizatave ndërkombëtare, si dhe përfaqësuesit e Policisë së Kosovës dhe Misionit të Bashkimit Evropian për Sundimin e Ligjit në Kosovë (EULEX)”, thuhet në përgjigjen e KFOR-it.
Për të përcjellë nga afër këtë ndryshim, në urën e Ibrit doli edhe ministri në detyrë i Punëve të Brendshme, Xhelal Sfeçla, i shoqëruar nga ministri në detyrë i Pushtetit Lokal, Elbert Krasniqi.
Sfeçla para mediave foli për këtë proces të nisur.
“Kjo vjen pas një pune të gjatë dhe të suksesshme të të gjitha institucioneve të sigurisë, pas sukseseve të njëpasnjëshme të Policisë së Kosovës në sigurimin e rendit dhe ligjit dhe në ofrimin e sigurisë për të gjithë qytetarët, pa asnjë dallim. Sigurisht që, me përmirësimin e sigurisë, edhe vetë prezenca e Policisë së Kosovës do të reduktohet. Është një proces afatshkurtër, i cili do të ofrojë garanci për të gjithë se hapja e urës do të jetë një e mirë për të gjithë, pa pasur ndikim negativ te askush”, tha Sveçla.
Mes tjerash, ai foli edhe për mundësinë e hapjes së Urës së Ibrit.
“Të gjithë jemi të angazhuar që ky proces të përfundojë sa më mirë që është e mundur. Shumë shpejt do të kemi lajme të tjera të mira”, u shpreh ai.
Por, çfarë do të thotë ky ndryshim për sigurinë në këtë pjesë të vendit?
“Kjo do të thotë që, në aspektin e sigurisë publike, situata e sigurisë është shumë e relaksuar, ashtu siç ka qenë në tri vitet e fundit, duke pasur parasysh që nuk ke asnjë incident etnik. Normalisht, i vjen dita që edhe kjo urë të lëshohet, pasi ka qenë njëfarë ure simbolike”, thotw njohwsi i sigurisw, Arben Dashevci.
Për këtë zhvillim, KFOR-i ka bërë të ditur se janë njoftuar edhe homologët e tyre në Serbi.
Por, pavarësisht kësaj, Lista Serbe, në emër të popullit serb, ka shprehur kundërshtim të fuqishëm ndaj, siç thonë ata, tërheqjes apo çdo zvogëlimi të pranisë së pjesëtarëve të KFOR-it në Urën Kryesore mbi Ibër.
Madje, ata kanë bërë të ditur se kanë kërkuar një takim urgjent me komandantin e KFOR-it.
