Biznesmeni dhe ish-gazetari-botues italian Valter Lavitola është arrestuar dhe dërguar në burg, i dyshuar nga Prokuroria e Romës si porositësi i atentatit me eksploziv ndaj gazetarit Sigfrido Ranucci, raportojnë mediat italiane.
Sulmi ndodhi në tetor 2025, pranë banesës së Ranuccit në Pomezia, pranë Romës. Masa e arrestit ndaj Lavitolës është caktuar nga Gjykata e Romës në kuadër të hetimeve të Prokurorisë. Në dosjen hetimore përfshihet edhe dyshimi për përdorimin e metodave mafioze.
Sipas hetuesve, dyshimet ndaj Lavitolës mbështeten në analizën e të dhënave telefonike, gjurmimin e automjeteve dhe ekzaminimin e telefonave celularë të personave të përfshirë në hetim. Sipas prokurorisë, këto elemente kanë vënë në pikëpyetje alibitë e të dyshuarve.
Në të njëjtën çështje, autoritetet italiane kanë lëshuar urdhër arresti edhe për shtetasin kamerunas Gomes Clesio Tavares, i cili dyshohet se ka shërbyer si ndërmjetës mes Lavitolës dhe grupit që dyshohet se kreu sulmin. Tavares është aktualisht në arrati.
Sipas prokurorisë, Lavitola dyshohet se ka planifikuar sulmin dhe ka udhëzuar Tavaresin për gjetjen e personave që do të siguronin eksplozivin dhe do të realizonin atentatin.
Hetuesit pretendojnë gjithashtu se Lavitola ka marrë pjesë në një inspektim paraprak në Pomezia më 15 shtator 2025. Sipas akuzës, Tavares më pas ka rekrutuar personat që dyshohet se kryen sulmin.
Avokati i Ranuccit, Roberto De Vita, tha pas arrestimit se motivi dhe konteksti i atentatit mbeten për t’u përcaktuar. Hetimi vijon për të sqaruar rolin e personave të përfshirë dhe motivin e sulmit.
The post Atentati ndaj gazetarit Sigfrido Ranucci, arrestohet biznesmeni italian, akuzohet si porositës i sulmit appeared first on Gazeta Express.
