Aleanca ka kërkuar që Kuvendi i Kosovës të mblidhet sonte në seancë të jashtëzakonshme, me synimin që procesi i konstituimit të përfundojë brenda afatit të përcaktuar.
Shefi i Grupit Parlamentar të Aleancës, Besnik Tahiri, tha se kërkesa është bërë në koordinim me grupet e tjera parlamentare dhe se seanca propozohet të mbahet në orën 22:30.
“Si grup parlamentar, në diskutim edhe me grupet e tjera parlamentare, kemi një kërkesë për një seancë të jashtëzakonshme, e cila duhet të thirret sonte në orën 22:30”, tha Tahiri në një konferencë për media.
Sipas tij, deputetët e zgjedhur dhe të betuar synojnë të mblidhen për t’i kërkuar kryesuesit të seancës konstituive vazhdimin e punimeve.
“Ne, me autorizimin tonë si deputetë të zgjedhur dhe të betuar në Kuvend, të mblidhemi dhe t’i kërkojmë kryesuesit të seancës konstituive që ta thërrasë seancën dhe sonte ta përfundojmë procesin”, deklaroi ai.
Kërkesa e Aleancës vjen në një kohë kur seanca konstituive e Kuvendit është caktuar të vazhdojë të shtunën në orën 11:00.
Ndërkohë, afati i përcaktuar për përfundimin e procesit të konstituimit të Kuvendit skadon sonte. /Telegrafi/
