Një aksident i rëndë hekurudhor me pasojë vdekjen e një 23-vjeçari ka ndodhur në orët e para të mëngjesit të së hënës në Gjermani, në zonën e Stacionit Jugor të trenit (Sudbahnhof).
Sipas informacioneve paraprake të policisë, i riu ndodhej për arsye ende të paqarta në zonën e shinave, kur u godit nga një tren që ishte në lëvizje. Pavarësisht reagimit të shpejtë të ekipeve të emergjencës, ai nuk arriti t’u mbijetojë plagëve të marra dhe u shpall i vdekur në vendngjarje, raportojnë mediat gjermane.
Për shkak të aksidentit, qarkullimi hekurudhor në këtë segment u ndërpre përkohësisht, duke shkaktuar vonesa dhe kufizime në lëvizjen e trenave.
Sipas dëshmive të personave që ndodheshin në afërsi, ekziston dyshimi se 23-vjeçari mund të ketë qenë nën ndikimin e alkoolit në momentin e aksidentit. Megjithatë, autoritetet theksojnë se ky informacion ende nuk është konfirmuar dhe po verifikohet në kuadër të hetimeve.
Hetimet për zbardhjen e plotë të rrethanave të aksidentit janë marrë përsipër nga sektori kompetent i Policisë Kriminale në Darmstadt. Deri më tani nuk janë bërë publike detaje të tjera mbi shkaqet e ngjarjes.
Policia u ka kërkuar qytetarëve mirëkuptim, duke bërë të ditur se hetimet janë ende në vijim dhe se çdo informacion i ri do të publikohet sapo të konfirmohet nga autoritetet.
