Nënkryetari i Lidhja Demokratike e Kosovës, Lutfi Haziri, ka deklaruar se deri më tani nuk ka pasur asnjë takim apo ftesë nga lideri i Lëvizja Vetëvendosje dhe kryeministri në detyrë, Albin Kurti.
Pas mbledhjes së Kryesisë së LDK-së me kryetarët e degëve, Haziri tha se partia e tij nuk ka zhvilluar asnjë takim me Vetëvendosjen lidhur me zhvillimet politike.
“Më lejoni ta konfirmoj edhe njëherë. As nuk kemi pasur ftesë, as nuk iu kemi ofruar askujt. Parimet gjithëpërfshirëse sipas rezultatit të fundit e njohin të drejtën e partisë së parë dhe i njohin të drejtat tona lidhur me peshën që na e kanë dhënë qytetarët. Takime nuk ka pasur deri në momentin që po flasim, sepse nuk ka pasur asnjë ftesë”, u shpreh Haziri.
Ai foli edhe për diskutimet e zhvilluara në mbledhjen e partisë, duke bërë të ditur se LDK-ja ka nisur analizën e situatës paszgjedhore dhe të rezultatit të zgjedhjeve.
“Debati i brendshëm i LDK-së në situata paszgjedhore ka filluar sot. Natyrisht që disa degë dhe kolegë tanë kanë bërë veprime paszgjedhore që kanë shkaktuar edhe procese. Por, sot në kolegjiumin e degëve, diskutuam çështjet, analizuam numrat, vlerësimet e para që dalin nga rezultati zgjedhor. Numrat janë ata që LDK-së i kanë dhënë këtë peshë politike. Ne jemi në një grup parlamentar prej 18 deputetësh. Pak a shumë në një situatë paszgjedhore në të cilën besojmë shumë që do të arrijmë ta mbyllim këtë proces pas certifikimit të rezultateve zgjedhore”, tha Haziri.
