Një shpërthim ka tronditur pas mesnatës një lagje në qytetin e Prizrenit, ku cak i sulmit ka qenë shtëpia e avokatit Betim Kadolli.
Sipas informacioneve fillestare, persona të panjohur kanë hedhur një mjet shpërthyes në oborrin e banesës së Kadollit.
Nga ngjarja nuk raportohet për persona të lënduar, por janë shkaktuar dëme materiale në pronë.
Rastin e ka konfirmuar edhe kryeprokurori i Prizrenit, Petrit Kryeziu, i cili ka bërë të ditur se hetimet janë në zhvillim.
Ai tha se ende nuk dihen motivet e sulmit dhe se autoritetet janë duke punuar për zbardhjen e plotë të rastit.
“Qëndrojnë informatat, mirëpo ende nuk është zbuluar kryesi i veprës dhe ende nuk dihen motivet. Jemi duke punuar në grumbullimin e provave dhe identifikimin e kryesit/esve të veprës”, deklaroi Kryeziu.
Policia dhe prokuroria po vazhdojnë hetimet për identifikimin e autorëve dhe sqarimin e rrethanave të shpërthimit.
