Kandidati për deputet nga Partia Socialdemokrate, Nol Nushi, ka kritikuar partitë opozitare për mënyrën se si po e zhvillojnë fushatën zgjedhore, duke thënë se ato nuk po arrijnë të ndërtojnë një alternativë të besueshme kundër qeverisë.
Në emisionin “Info Nata” në Tëvë1, Nushi tha se partitë opozitare shpesh akuzojnë qeverinë për korrupsion dhe probleme të tjera, por sipas tij, nuk i adresojnë problemet brenda radhëve të tyre.
“Unë i shoh të njëjtit opozitarë duke e akuzuar qeverinë për korrupsion, por asnjëherë nuk e kanë denoncuar korrupsionin brenda partive të tyre. I shoh duke e akuzuar qeverinë për mafien energjetike, por nuk i akuzojnë anëtarët e partive të tyre që janë pjesë e tregut energjetik në Kosovë. Këto gjëra të bëjnë kredibil ose jo kredibil, të besueshëm ose jo të besueshëm”, tha Nushi.
Ai shtoi se PSD po zhvillon një fushatë më të thjeshtë, duke u fokusuar te mesazhi politik dhe jo te marketingu i kushtueshëm.
“Andaj, kot i bëjnë ato videot e bukura me shumë para e me kompani të shtrenjta marketingu. Ne i bëjmë vetë dhe shumë më thjeshtë. Për këtë arsye besojmë se kredibiliteti ynë është shumë më i lartë se ai i partive opozitare”, deklaroi ai.
Nushi theksoi se PSD nuk po synon të garojë me opozitën aktuale, por të ndërtojë një opozitë të re dhe më efektive ndaj pushtetit.
“Ne nuk po bëjmë fushatë kundër opozitës, por po themi se po ndërtojmë një opozitë të vërtetë, jo vetëm formale. Një opozitë që e sfidon pushtetin. Me fuqinë tonë po garojmë për të qenë opozitë, sepse për t’i bërë opozitë një qeverisjeje si ajo e Albin Kurtit duhet një qasje tjetër”, tha ai.
Sipas Nushit, opozita aktuale po dështon ta sfidojë qeverinë dhe, në vend se ta dobësojë, po e forcon atë politikisht.
“Unë nuk jam kundër opozitës në parim, por jam kundër kësaj opozite që vetëm po e forcon Kurtin. Kjo opozitë është pengesë për ndërtimin e një mase të fuqishme kundërshtuese ndaj qeverisë Kurti”, u shpreh ai.
Në fund, Nushi tha se përballë një qeverie që, sipas tij, ka pushtet të madh institucional dhe financiar, nevojitet një opozitë më serioze dhe më e organizuar.
“Kjo qeveri është e fuqishme në numra, në financa dhe në kontrollin institucional. Përballë një pushteti të tillë nuk na duhet një opozitë që merret me video në TikTok apo me marketing sipërfaqësor. Kam kuptuar se kjo opozitë nuk e kupton Kurtin dhe as nuk di ta lexojë atë politikisht”, përfundoi Nushi.
