Arrestohet shtetasi kosovar në Ulqin, dyshohet për vrasje të bashkëjetueses dhe zjarrvënie

Një 46-vjeçar nga Kosova, me inicialet B.G., është arrestuar nën dyshimin për vrasje të rëndë të bashkëjetueses së tij dhe për zjarrvënie në vendin e ngjarjes në Ulqin.

Sipas njoftimit të Policisë, rreth orës 00:30 të mesnatës, autoritetet janë informuar për një zjarr në një objekt banimi në lagjen Kodra.

Menjëherë pas mbërritjes në vendin e ngjarjes, policia ka gjetur trupin e pajetë të një gruaje, fillimisht të paidentifikuar, e cila më pas është identifikuar si D.N. (36), shtetase e Shqipërisë.

“Policia, në një kohë shumë të shkurtër, identifikoi dhe vuri nën kontroll personin i cili dyshohet se gjatë natës kreu veprën penale të vrasjes së rëndë ndaj bashkëjetueses së tij, dhe më pas i vuri zjarrin vendit të ngjarjes, shtëpisë ku ata jetonin së bashku në lagjen Kodra në Ulqin. Departamenti i Sigurisë në Ulqin rreth orës 00:30 pas mesnate u njoftua se në një objekt banimi kishte shpërthyer zjarr. Zyrtarët policorë dolën menjëherë në vendin e ngjarjes, ku gjetën trupin e pajetë të një personi të panjohur, i identifikuar më vonë si D.N. (36), shtetase e Shqipërisë”, thuhet në njoftimin e policisë.

Policia bën të ditur se, pas veprimeve të shpejta hetimore, përfshirë marrjen e deklaratave, sigurimin e pamjeve të kamerave të sigurisë dhe provave materiale, është identifikuar dhe vënë nën kontroll i dyshuari B.G.

Sipas dyshimeve të para, ai ka kryer vrasjen e rëndë dhe më pas i ka vënë zjarrin shtëpisë ku ndodhi ngjarja.
Prokurori shtetëror në Prokurorinë e Lartë Shtetërore në Podgoricë është njoftuar për rastin dhe ka urdhëruar ndërmarrjen e veprimeve hetimore.

“Për rastin është njoftuar prokurori shtetëror në Prokurorinë e Lartë Shtetërore në Podgoricë. Zyrtarët policorë, në koordinim dhe me urdhër të prokurorit kompetent, kanë ndërmarrë të gjitha masat dhe veprimet për zbardhjen e rastit, kanë marrë deklarata nga disa persona dhe kanë siguruar pamje nga kamerat e sigurisë, si dhe prova materiale nga vendi i ngjarjes, të cilat do t’i nënshtrohen ekspertizës. Veprimet e deritanishme policore dhe prokuroriale tregojnë dyshimin se B.G. ka kryer veprën penale të vrasjes së rëndë, ka vënë zjarr në vendin e ngjarjes dhe më pas është larguar prej aty”, thuhet më tej në komunikatë.

Trupi i viktimës është dërguar për obduksion në Qendrën Klinike të Podgoricës, ku do të përcaktohen shkaqet e vdekjes dhe rrethanat e ngjarjes.

Ndërkohë, i dyshuari B.G. ndodhet nën mbikëqyrje policore dhe po trajtohet për lëndimet e marra nga djegiet gjatë ngjarjes.

“Trupi i viktimës D.N. është dërguar për obduksion mjeko-ligjor në Qendrën Klinike në Podgoricë, ku do të përcaktohen shkaku i vdekjes dhe rrethanat e sakta në të cilat ka ndodhur ajo. Personi B.G. është vënë nën kontroll dhe po ruhet nga policia në Qendrën Klinike, ku po trajtohet për djegiet që ka marrë gjatë ngjarjes. Për informacione të tjera lidhur me rastin, publiku do të njoftohet me kohë nga organet kompetente që po merren me hetimin”, thuhet në njoftim./teve1,info/