Ish-presidentja e Kosovës, Vjosa Osmani, ka reaguar pas lajmit për ndarjen nga jeta të aktivistit Hafiz Gagica, duke e vlerësuar atë si veprimtar të rëndësishëm të çështjes kombëtare shqiptare dhe mërgatës në Gjermani.
Osmani tha se Gagica do të kujtohet për përkushtimin, urtësinë dhe kontributin e tij në shërbim të çështjes kombëtare dhe diasporës shqiptare.
Ajo theksoi se ai ishte një zë i fuqishëm i angazhimit qytetar në kohë të vështira për vendin.
“Vdekja e tij e parakohshme ka pikëlluar të gjithë ata që e njohën e patën mundësi të bashkëpunonin me të. Në personalitetin e tij, bashkëpunëtorët e tij kanë gjetur gjithmonë njeriun e matur, i cili nuk kursehej për asgjë. Ai la boshllëk të thellë në familje, në shoqëri dhe në të gjithë atdheun, për të cilin kontribuoi tërë jetën”, ka shkruar ajo në Facebook.
Osmani kujtoi gjithashtu se më 30 mars 2026, si Presidente e vendit, e kishte dekoruar Gagicën me Medaljen Presidenciale të Meritave për kontributin e tij.
Në fund, ajo i shprehu ngushëllime familjes Gagica, miqve dhe bashkëveprimtarëve, duke thënë: “Qoftë i përhershëm kujtimi për të. I qoftë i lehtë dheu i Kosovës.”
