Zëvendëspresidenti i Shteteve të Bashkuara, JD Vance, ka deklaruar se Uashingtoni ndodhet në mes të një procesi të ndërlikuar në raport me Iranin, duke e cilësuar rrugën drejt përfundimit të konfliktit si të vështirë dhe me shumë pengesa.
Në një intervistë, Vance tha se është i gatshëm të marrë përgjegjësi për përpjekjet që synojnë arritjen e një zgjidhjeje pozitive të luftës.
“Nëse duan që unë të marr përgjegjësinë për përpjekjet për ta çuar këtë luftë drejt një përfundimi pozitiv, jam i gatshëm ta bëj këtë”, u shpreh ai.
Sipas Vance, negociatat nuk zhvillohen në mënyrë lineare, por kalojnë nëpër faza të ndryshme.
“Ndonjëherë bëjmë një hap përpara, dy prapa, pastaj tre përpara dhe një prapa. Është e kuptueshme që qytetarët amerikanë mund të mendojnë se po bëhet përparim, e më pas të krijohet përshtypja se nuk po ndodh ashtu”, tha ai.
Zëvendëspresidenti amerikan e përshkroi procesin si veçanërisht të ndërlikuar, duke theksuar se brenda sistemit politik iranian ekzistojnë qëndrime të ndryshme.
“Sistemi i tyre është i fragmentuar. Ka njerëz që duan t’i japin fund luftës, por ka edhe elementë ekstremistë që duan vazhdimin e saj”, deklaroi Vance.
Ai shtoi se detyra e administratës amerikane është të veprojë në këtë situatë komplekse për të arritur rezultatin më të mirë të mundshëm për popullin amerikan dhe për Shtetet e Bashkuara.
The post Vance: Jemi në mes të një situate komplekse me Iranin appeared first on Gazeta Express.
