Evropa po përballet me një valë ekstreme të të nxehtit, me temperatura që kanë arritur deri në 40°C në disa rajone, ndërsa stuhi të fuqishme kanë goditur zona të tjera të kontinentit, duke shkaktuar ndërprerje të shumta dhe viktima.
Në Francë, autoritetet shëndetësore kanë raportuar rreth 1,000 vdekje gjatë kësaj vale të të nxehtit rekord. Agjencia e shëndetit publik bëri të ditur se shumica e viktimave janë persona të moshuar dhe paralajmëroi se numri mund të rritet, pasi të dhënat nga shtëpitë e kujdesit dhe banesat private ende po përditësohen.
Shkencëtarët theksojnë se kjo valë e të nxehtit, e cila ka nisur më 20 qershor, konsiderohet ndër më të ashprat e regjistruara ndonjëherë në Evropë. Temperaturat ekstreme kanë shkaktuar ndërprerje në sistemet energjetike, dëmtime të infrastrukturës dhe mbingarkesë në sistemet shëndetësore.
Drejtori i Përgjithshëm i Organizatës Botërore të Shëndetësisë, Tedros Adhanom Ghebreyesus, ka deklaruar se rreth 150 milionë njerëz janë aktualisht të ekspozuar ndaj nxehtësisë ekstreme. Ai ka theksuar se qindra persona kanë humbur jetën, ndërsa shkollat janë mbyllur dhe rrjetet energjetike janë vënë nën presion të madh.
Sipas shkencëtarëve, kjo valë e të nxehtit do të kishte qenë “thuajse e pamundur” pa ndikimin e ndryshimeve klimatike të shkaktuara nga njeriu, duke e bërë dukurinë e valëve ekstreme të nxehtësisë gjithnjë e më të shpeshtë.
Probleme të mëdha janë raportuar edhe në transport dhe energji. Në Gjermani, janë reduktuar shërbimet hekurudhore në një linjë kryesore në Nordrhein-Westfalen, ndërsa në qytetin Leipzig janë pezulluar tramvajet. Shumë qytetarë kanë qëndruar në shtëpi për t’u mbrojtur nga temperaturat e larta, raporton Reuters.
Në Itali dhe vende të tjera të Evropës Jugore, i nxehti ka ndikuar edhe në rrjedhën e lumenjve, duke ulur nivelin e ujit dhe duke krijuar probleme për bujqësinë dhe prodhimin e energjisë. Në Hungari, termocentrali bërthamor i Paks-it ka ulur sërish prodhimin për shkak të rritjes së temperaturës së lumit Danub që përdoret për ftohje.
Ndërkohë, në Itali raportohet se dhjetëra persona kanë humbur jetën duke u përpjekur të gjejnë freski në ujëra, ndërsa ekipet e shpëtimit po kërkojnë edhe për bashkëshortin e një ministreje, i cili është zhdukur gjatë notit në një liqen pranë Romës.
Autoritetet evropiane po paralajmërojnë se situata mund të përkeqësohet edhe më tej nëse temperaturat ekstreme vazhdojnë.
