Prokuroria Speciale e Republikës së Kosovës ka kërkuar caktimin e masës së paraburgimit ndaj të dyshuarit me inicialet E.H., nën dyshimin për përfshirje në veprën penale “Përgatitje e veprës penale Vrasje e rëndë”.
Sipas njoftimit të Prokurorisë, E.H. dyshohet se kishte planifikuar vrasjen e personit me inicialet M.D., për shkak të një mosmarrëveshjeje të mëhershme që kishte ndodhur në Shtetet e Bashkuara të Amerikës në vitin 2021.
Prokuroria Speciale ka bërë të ditur se i dyshuari, në bashkëpunim me A.D., i cili tashmë është i akuzuar në këtë rast, kishte organizuar planin për eliminimin e të dëmtuarit me motiv hakmarrjeje.
Sipas hetimeve, ekziston dyshimi i bazuar se E.H. kishte arritur marrëveshje me një person tjetër të identifikuar si A.L., duke i ofruar shumën prej 100 mijë eurosh për të angazhuar persona që do ta kryenin vrasjen e M.D.
Kërkesa për paraburgim është dorëzuar në Gjykata Themelore në Prishtinë pas arrestimit të E.H. në Gjermani.
Ndërkohë, gjatë ditës së sotme, Policia e Kosovës ka njoftuar se më 21 maj 2026 është realizuar ekstradimi i një shtetasi malazez nga Gjermania për në Kosovë, i cili kërkohej me letër-rreshtim ndërkombëtar nga INTERPOL-i për veprën penale “vrasje e rëndë”.
Sipas Policisë, i dyshuari ishte arrestuar nga autoritetet gjermane pasi dyshohej se i ishte shmangur drejtësisë kosovare. Ekstradimi u realizua në koordinim mes institucioneve të Kosovës dhe Gjermanisë, ndërsa pas mbërritjes në Kosovë ai iu dorëzua njësive përkatëse policore për procedura të mëtejshme ligjore.
The post U ektradua nga Gjermania për planifikim të vrasjes, Prokuroria kërkon paraburgim ndaj E.H. appeared first on Gazeta Express.
