Mbyllja do të bëhet vetëm gjatë natës për shkak të punimeve të mirëmbajtjes, ndërsa trafiku do të devijohet përmes rrugës së qafës së Gotthardit.
Tuneli rrugor i Gotthardit do të mbyllet për 12 net gjatë muajit gusht për shkak të punimeve të mirëmbajtjes, ka njoftuar Zyra Federale Zvicerane e Rrugëve (FEDRO/ASTRA), përcjell albinfo.ch.
Sipas autoriteteve, mbylljet do të zbatohen nga 10 deri më 27 gusht, nga e hëna deri të enjten, në intervalin 23:00 deri në 05:00. Gjatë fundjavës, të premten, të shtunën dhe të dielën, tuneli do të mbetet i hapur për qarkullim.
Gjatë orëve të mbylljes, automjetet do të devijohen përmes rrugës së Qafës së Gotthardit, ndërsa autoritetet u bëjnë thirrje drejtuesve të mjeteve që të planifikojnë udhëtimet e tyre paraprakisht, sidomos në periudhën e pushimeve verore kur fluksi i trafikut është më i madh.
Punimet kanë për qëllim mirëmbajtjen e infrastrukturës së tunelit dhe rritjen e sigurisë për përdoruesit. Tuneli rrugor i Gotthardit, me gjatësi rreth 17 kilometra, është një nga arteriet më të rëndësishme që lidh veriun me jugun e Zvicrës dhe përdoret çdo vit nga miliona udhëtarë.
The post Tuneli rrugor i Gotthardit do të mbyllet për 12 net gjatë muajit gusht appeared first on Gazeta Express.
