Të paktën 20 persona kanë humbur jetën pas tërmetit të fuqishëm me magnitudë 7.4 që goditi të hënën pjesën perëndimore të Kolumbisë dhe u ndje edhe në Ekuador.
Lëkundjet e fuqishme kanë shkaktuar dëme të mëdha në disa qytete, me ndërtesa të shembura dhe persona që raportohet se kanë mbetur të bllokuar nën rrënoja.
Sipas raportimeve të fundit, pjesa më e madhe e viktimave është regjistruar në Pereira, ndërsa dy persona kanë humbur jetën në Manizales.
Epiqendra e tërmetit ishte pranë San Jose del Palmar, në rajonin Choco, rreth 400 kilometra në perëndim të kryeqytetit Bogota, në një thellësi prej rreth 107 kilometrash.
Në Pereira, situata paraqitet veçanërisht e rëndë, me disa ndërtesa të shembura dhe persona që dyshohet se ndodhen ende nën rrënoja.
Në Manizales, një pjesë e katedrales së qytetit është shembur, ndërsa autoritetet vijojnë operacionet e kërkim-shpëtimit. Në Cali, autoritetet kanë raportuar persona të bllokuar në të paktën 19 ndërtesa.
Lëkundjet janë ndjerë në një zonë të gjerë, përfshirë edhe Ekuadorin, ndërsa banorë në qytete të ndryshme kanë dalë në rrugë për shkak të frikës nga shembjet dhe pasgoditjet. /Panorama
The post Tërmeti i fuqishëm në Kolumbi, raportohet për 20 persona të vdekur, shumë të tjerë nën rrënoja appeared first on Gazeta Express.
