Oleksiy Goncharenko e quajti gabim trashanik deklaratën e presidentit të vendit të tij, Volodymyr Zelensky gjatë një vizite të shtunën në Beograd, nga ku ai tha se e respekton “integritetin territorial” të Serbisë dhe se qëndrimi i Ukrainës ndaj Kosovës “mbetet i pandryshuar”.
Deputeti ukrainas thotë në një intervistë për Gazetën Express se shantazhi që kujton se ia bënte Ukrainës presidenti rus, Vladimir Putin me çështjen e Kosovës, nuk funksionon më.
Kur kishte folur për Gazetën Express në vitin 2022, ai kishte thënë se nuk e di se çfarë mendon Zensky për Kosovën. Tash thotë se nuk e kupton këtë qëndrim.
“Sa i përket deklaratave të Putinit, mund të pajtohem se për një periudhë mjaft të gjatë ato përbënin një perspektivë tmerruese për shumë politikanë ukrainas. Në fakt, Putini po e shantazhonte Ukrainën lidhur me çështjen e Kosovës dhe, fatkeqësisht, ia doli”, thotë ai.
Goncharenko shpjegon se pse tani “shantazhi i Putinit nuk funksionon më“.
“Kjo është edhe arsyeja pse nuk e kuptoj vendosmërinë e Zelenskyt për çështjen e njohjes”, thotë ai.
Intervistoi Shqiprim Salihu
Gazeta Express: E quajtët gabim trashanik deklaratën e presidentit ukrainas, Volodymyr Zelensky në Beograd se qëndrimi i Ukrainës ndaj Kosovës “mbetet i pandryshuar”, ndërsa e shihte vendin nga prizmi i “integritetit territorial” të Serbisë. Përveç asaj që keni shkruar në X, pse, sipas jush, ishte e gabuar kjo deklaratë?
Goncharenko: Së pari, besoj sinqerisht se Kosova duhet të jetë shtet i pavarur, sovran dhe i njohur. Për shumë vite kam luftuar për njohjen e Kosovës nga institucionet europiane, si Këshilli i Europës, si dhe nga Ukraina. Unë isha autor i rezolutës së Verkhovna Radës së Ukrainës, e cila synonte njohjen e shtetit. Fatkeqësisht, sipas Kushtetutës së Ukrainës, e drejta për njohje i takon autoritetit presidencial. Megjithatë, unë vazhdoj përpjekjet e mia për të lobuar për vendimin e njohjes.
Gazeta Express: Shumë mund të thonë se është në interesin e Ukrainës ta mbajë këtë qëndrim. Çfarë do t’u thoshit atyre që mendojnë kështu? E patë edhe që një baner i madh në qendër të Prishtinës, ku shkruhej “Free Ukraine” u hoq dje. Si e komentoni këtë?
Goncharenko: Besoj se vendimi i Zelenskyt është një gabim trashanik diplomatik, pasi Kosova është një nga mbështetësit tanë më të mëdhenj dhe partnerët tanë më të besueshëm në Ballkan. Në postimin tim në X, unë shtova gjithashtu pamje filmike të heqjes së banerit “Free Ukraine” në kryeqytetin e Kosovës. Ky është një sinjal se Ukraina mund ta humbasë një aleat dhe besoj me gjithë zemër se ne nuk mund t’i lejojmë vetes veprime të tilla diplomatike.
Sa i përket interesave të Ukrainës për ta mbajtur një qëndrim të tillë, ekziston një ide mbizotëruese se Ukraina mund ta bëjë Serbinë ta shpërbëjë aleancën e saj të pathënë me Rusinë dhe ta rrisë bashkëpunimin ekonomik dhe ushtarak me Ukrainën. Serbia gjithashtu shihet nga disa analistë si një “aleate” potenciale në një bllok të shteteve kandidate për anëtarësim në BE.
Gazeta Express: Gjatë vizitës së tij në Beograd, Zelensky foli gjithashtu për bashkëpunim me Serbinë pas luftës, veçanërisht në aspektin e politikës së jashtme. Çfarë prisni nga kjo?
Goncharenko: Është raportuar se Serbia i ka shitur Ukrainës një numër të padeklaruar predhash artilerie dhe raketash MLRS në vitin 2023. Rritja e dërgesave të tilla do të ishte jashtëzakonisht e përshtatshme në kohë në rast të një mobilizimi të mëtejshëm rus.
Gazeta Express: Presidenti rus, Vladimir Putin tha në prill të vitit 2022 se, nëse Kosova mund ta shpallë pavarësinë, atëherë pse nuk mund ta bëjnë këtë edhe Donetsku dhe Luhansku. A mendoni se përpjekja e Rusisë për ta përdorur Kosovën si precedent ose justifikim për luftën po e mban Zelenskyn në këtë qëndrim lidhur me Kosovën?
Goncharenko: Sa i përket deklaratave të Putinit, mund të pajtohem se për një periudhë mjaft të gjatë ato përbënin një perspektivë tmerruese për shumë politikanë ukrainas. Në fakt, Putini po e shantazhonte Ukrainën lidhur me çështjen e Kosovës dhe, fatkeqësisht, ia doli.
Megjithatë, jemi në vitin 2026. Rusia i “njohu” të ashtuquajturat DPR dhe LPR, duke i përdorur ato si casus belli, dhe më pas i “integroi”. Shantazhi i Putinit nuk funksionon më. Kjo është edhe arsyeja pse nuk e kuptoj vendosmërinë e Zelenskyt për çështjen e njohjes.
The post Deputeti ukrainas: S’e kuptoj vendosmërinë e Zelenskyt për të mos e njohur Kosovën, shantazhi i Putinit me këtë çështje s’funksionon më appeared first on Gazeta Express.
