Të shtëna me armë zjarri kanë tronditur qytetin Billings në shtetin amerikan të Montanës, ku disa persona, mes tyre edhe fëmijë, janë vrarë brenda një banese. Personi i armatosur dyshohet se më pas i ka vënë flakën banesës dhe ka vrarë veten me armë zjarri.
Ngjarja ka ndodhur pranë zonës West End, ndërsa autoritetet e kanë përshkruar fillimisht si një incident familjar.
Sherifi i përkohshëm i Qarkut Yellowstone, Kent O’Donnell, ka deklaruar se në banesë kanë humbur jetën “shumë persona, mes tyre dhe disa të mitur”.
Numri dhe identiteti i viktimave ende nuk janë bërë zyrtarisht të ditura. Ndërkohë, një faqe për mbledhjen e fondeve në GoFundMe pretendon se në incident kanë humbur jetën të paktën tetë persona, përfshirë dy fëmijë.
Policia është njoftuar pasi një qytetar ka raportuar se kishte dëgjuar të shtëna me armë. Oficerët kanë mbërritur në vendngjarje rreth 10 minuta më vonë, ku kanë dëgjuar të shtëna nga pjesa e pasme e banesës.
Pak minuta më pas, banesa është përfshirë nga flakët.
Zjarrfikësit janë përballur me vështirësi gjatë ndërhyrjes për shkak të qasjes së kufizuar në ujë dhe mungesës së hidrantëve të mjaftueshëm.
Sipas shefit të zjarrfikësve të Billings, Matt Hoppel, situata e zjarrit është përkeqësuar me shpejtësi, ndërsa banorët nuk kanë mundur të shpëtojnë.
Autoritetet kanë nisur hetimet për zbardhjen e plotë të rrethanave të ngjarjes, ndërsa motivi i sulmit dhe shkaku i saktë i zjarrit mbeten ende nën hetim.
The post Sulm me armë në Montana, disa persona të vrarë – mes tyre edhe fëmijë appeared first on Gazeta Express.
