Moti i keq vijon të godasë Italinë, veçanërisht rajonet veriore. Në Lombardi, zjarrfikësit kanë kryer më shumë se 190 ndërhyrje, kryesisht për shkak të pemëve të rrëzuara, dëmeve nga uji, përmbytjeve dhe dëmtimeve të çative.
Që nga mbrëmja e 24 gushtit, ekipet e zjarrfikësve janë angazhuar në zona të ndryshme të Lombardisë. Provinca më e prekur është Varese, me mbi 100 ndërhyrje, e ndjekur nga Como me rreth 35 dhe Milano me rreth 30.
Në disa raste, pemët kanë rënë mbi rrugë, makina, banesa dhe linja elektrike. Për shkak të numrit të madh të kërkesave për ndihmë në zonën e Varese-s, në ndihmë janë dërguar edhe pesë ekipe nga komanda të tjera të rajonit.
Moti i keq shkaktoi probleme të konsiderueshme edhe në aeroportin Malpensa. Pistat dhe disa zona të terminalit u përfshinë nga uji, megjithëse situata u normalizua më vonë. Gjatë orëve të vona të mbrëmjes së 24 gushtit, disa fluturime në mbërritje dhe nisje u anuluan.
Gjatë natës, një front i fuqishëm me stuhi hyri nga brigjet e Toskana-s dhe më pas u zhvendos me shpejtësi drejt zonave të brendshme.
Zonat më të prekura ishin përgjatë bregdetit, nga Versilia në Pisa, Livorno dhe Massa, por moti i keq preku edhe zonat e brendshme të Firences dhe më në jug, drejt Grossetos.
Në Versilia u regjistrua një stuhi e fuqishme me rrufe, e shoqëruar me erëra të forta dhe disa raste të izoluara përmbytjesh në rrugë.
Probleme janë raportuar edhe në zona të ndryshme të Alto Adige-s. Në Val Casies, disa banesa, bodrume dhe garazhe janë përmbytur, ndërsa janë regjistruar edhe probleme me rrjetin elektrik dhe rrjedhje balte.
Në Val Passiria, ekipet e zjarrfikësve janë gjithashtu në terren. Në San Martino, brenda vetëm 30 minutash ranë 53 litra shi për metër katror.
The post Mot i keq në Itali: Anulohen fluturime në Malpensa, stuhi të fuqishme në veri dhe në Toskana appeared first on Gazeta Express.
