Zvicra shpenzon rreth 100 milionë franga zvicerane në vit për promovimin e imazhit të saj në botë, por efektiviteti i këtyre shpenzimeve po vihet në pikëpyetje nga Kontrolli Federal i Financave.

Sipas një raporti të këtij institucioni, mungojnë objektivat e qarta dhe mekanizmat e nevojshëm për të vlerësuar nëse paratë e shpenzuara po sjellin rezultatet e synuara.

Sipas raportimit të mediumit zviceran 20 Minuten, kontrolli financiar ka shqyrtuar aktivitetet e institucioneve federale që merren me promovimin e Zvicrës jashtë vendit, me fokus të veçantë te organizata “Prasenz Schëeiz”, e cila është përgjegjëse për përfaqësimin dhe forcimin e imazhit të vendit në arenën ndërkombëtare.

Në raport kritikohen veçanërisht mangësitë në matjen e ndikimit të fushatave promovuese, transmeton Telegrafi.

Edhe pse rezultatet nuk vlerësohen në mënyrë sistematike, institucionet përkatëse vazhdojnë të paraqesin aktivitetet e tyre si të suksesshme.

Kontrolli financiar vlerëson se kjo mënyrë e raportimit nuk ofron prova të mjaftueshme për ndikimin real të shpenzimeve.

Kritika të veçanta janë adresuar edhe ndaj strategjisë për periudhën 2021–2024, veçanërisht në fushën e inovacionit.

Sipas vlerësimit, projektet e financuara kanë qenë të fragmentuara, ndërsa administrimi i mbështetjes financiare ka kërkuar më shumë përpjekje burokratike sesa rezultate konkrete.

Megjithatë, raporti përmend edhe shembuj pozitivë të promovimit të Zvicrës. Një prej tyre është një fushatë e ambasadorit zviceran në Danimarkë, e cila ka ndihmuar në krijimin e një imazhi pozitiv për vendin, duke e paraqitur Zvicrën si një shtet me humor, miqësor ndaj mjedisit dhe me këmbë në tokë.

Kontrolli Federal i Financave ka ngritur shqetësime edhe për mënyrën se si Zvicra përballet me dezinformimin.

Sipas tij, një imazh i mirë ndërkombëtar mund ta bëjë vendin gjithashtu objektiv më tërheqës për fushata të organizuara dezinformimi, prandaj nevojitet një strategji më e qartë për identifikimin dhe përballimin e këtyre kërcënimeve.

Ndërkohë, për vitin 2027 është përgatitur një plan veprimi me shtatë prioritete dhe objektiva më të qarta diplomatike. Ministria e Jashtme zvicerane ka shprehur gjithashtu rezerva lidhur me disa prej vlerësimeve të shpenzimeve.

Raporti rikthen në vëmendje diskutimin për mënyrën se si përdoren paratë publike për promovimin e vendit jashtë kufijve dhe nevojën që institucionet të dëshmojnë jo vetëm sa shpenzojnë, por edhe çfarë rezultatesh konkrete arrijnë me këto fonde./Telegrafi/