Një nënë në Prishtinë ka denoncuar ish-bashkëshortin e saj, duke pretenduar se ai po ushtron presion të vazhdueshëm psikologjik ndaj dy fëmijëve të tyre të mitur. Rasti ka marrë trajtim nga hetuesit e dhunës në familje, ndërsa gruaja ka dorëzuar në Polici edhe një raport të psikologut lidhur me gjendjen e njërës prej fëmijëve, mëson Gazeta Sinjali.
Denoncimi është bërë të mërkurën, më 11 nëntor, rreth orës 08:30, në Stacionin Policor Veriu në Prishtinë.
Sipas informacioneve që ka siguruar Sinjali, ankuesja është F.H. rreth 38-vjeçare, e cila ka deklaruar se ish-bashkëshorti i saj, K.H., po u shkakton presion psikologjik dy fëmijëve të tyre, një vajze dhe një djali.
Gjatë intervistimit, nëna ka paraqitur një raport mjekësor të lëshuar nga psikologu për vajzën e mitur, dokument që është marrë në konsideratë gjatë trajtimit të denoncimit.
Pas shqyrtimit të informacioneve fillestare, është udhëzuar që vajza të intervistohet në cilësinë e dëshmitares, ndërsa djali të dëgjohet nga përfaqësuesit e Qendrës për Punë Sociale.
Rasti është trajtuar nga hetuesit e dhunës në familje, të cilët kanë njoftuar Prokurorinë për pretendimet e paraqitura nga nëna.
Me udhëzim të Prokurorisë është iniciuar procedura për veprën penale “Dhuna në familje”, ndërsa Policia është ngarkuar të sigurojë praninë e të dyshuarit për intervistim.
Sinjali – aty ku e vërteta flet para lajmit!
Burimi: Sinjali
