Dy persona të maskuar, një dru për t’ua ndryshuar drejtimin kamerave të sigurisë dhe një shtëpi e boshatisur nga sendet më të çmuara. Kështu dyshohet se është realizuar një vjedhje e rëndë në fshatin Koshare të Ferizajt, ku hajnat kanë marrë një orë Rolex me vlerë të deklaruar prej 60 mijë eurosh, stoli ari dhe gjashtë ora të tjera dore. Dëmi i përgjithshëm, sipas pronarit, arrin në rreth 93 mijë euro.
Burimet e Gazetës Sinjali bëjnë me dije se cak i vjedhjes ka qenë shtëpia e Z.K. 57 vjeçar, në rrugën “Bekim Murtezi”, ndërsa gjithçka ka ndodhur mbrëmjen e së shtunës, më 31 tetor.
Pronari dhe bashkëshortja e tij kishin dalë nga shtëpia rreth orës 18:00, pa e ditur se gjatë mungesës së tyre dy persona të maskuar do të hynin në pronë.
Kur u kthyen, rreth orës 20:40, i priste një pamje krejt tjetër. Xhami i derës së terasës ishte thyer, ndërsa sendet me vlerë nuk ndodheshin më aty.
Pronari e njoftoi menjëherë Policinë dhe më pas kontrolloi pamjet e kamerave të sigurisë, ku, sipas deklarimit të tij, kishte parë mënyrën se si dy të panjohurit kishin depërtuar në shtëpi.
Detaji më i pazakontë ishte mënyra se si hajnat kishin vepruar ndaj kamerave.
Sipas ankuesit, dy personat e maskuar kishin hyrë fillimisht në oborr dhe, me ndihmën e një druri, kishin ndryshuar drejtimin e kamerave të sigurisë.
Pasi kishin ndërhyrë te kamerat, dyshohet se kishin thyer me forcë xhamin e derës së terasës dhe kishin hyrë brenda.
Nga aty, sipas deklarimit të pronarit, ishin drejtuar te dhoma e gjumit, ku nga një sirtar kishin marrë stolitë e arit të bashkëshortes dhe disa ora dore.
Vetëm ora Rolex, sipas vlerës së deklaruar nga pronari, kushtonte rreth 60 mijë euro.
Përveç saj, janë raportuar të vjedhura edhe stoli ari në vlerë prej rreth 30 mijë eurosh, si dhe gjashtë ora të tjera dore, me vlerë të përgjithshme prej rreth 3 mijë eurosh.
Kështu, për një kohë relativisht të shkurtër, dy personat e maskuar dyshohet se janë larguar me sende që, sipas ankuesit, kapin vlerën e 93 mijë eurove.
Pas raportimit, në vendngjarje kanë dalë hetuesit rajonalë dhe njësia e forenzikës, të cilët kanë ekzaminuar shtëpinë dhe kanë ndërmarrë veprimet për sigurimin e provave.
Pronari ka deklaruar se nuk dyshon te ndonjë person i caktuar.
Me urdhër të Prokurorisë së Shtetit, rasti është iniciuar si “Vjedhje e rëndë”, ndërsa autorët mbeten të paidentifikuar.
Hetimet vazhdojnë për zbardhjen e ngjarjes dhe identifikimin e personave që dyshohet se qëndrojnë pas vjedhjes.
Sinjali – aty ku e vërteta flet para lajmit!
Burimi: Sinjali
