Atletico Madridi po shqyrton mundësinë e transferimit të Alejandro Baldes nga Barcelona në afatin kalimtar të janarit, pasi mbrojtësi i majtë raportohet se ka humbur rëndësinë në planet e trajnerit Hansi Flick.
Sipas gazetës spanjolle Marca, drejtuesit sportivë të klubit madrilen e kanë identifikuar krahun e majtë të mbrojtjes si një repart që kërkon përforcime, me synimin për të krijuar konkurrencë të drejtpërdrejtë me Alex Grimaldon.
Atletico synon të përfitojë nga pakënaqësia e Baldes me situatën e tij te Barcelona, ku minutat e lojës dhe roli në skuadër kanë rënë ndjeshëm nën drejtimin e Flickut.
Një tjetër dëshmi e pozitës së tij në skuadër ishte ndeshja e 8 nëntorit, kur Barcelona mposhti Atletico Madridin me rezultat 2-1, ndërsa Balde e ndoqi të gjithë takimin nga banka rezervë, pa u aktivizuar.
Në atë përballje, Flick bëri disa ndryshime në repartin defensiv, duke përdorur Frenkie de Jongun si zgjidhje emergjente në krahun e djathtë, ndërsa Gerard Martin dhe Eric Garcia u angazhuan në qendër të mbrojtjes.
Ky vendim është parë si një tjetër tregues se Balde nuk është ndër zgjedhjet kryesore të trajnerit gjerman.
Në fund të tetorit, Flick kishte folur edhe për nevojën që mbrojtësi të rikthente vetëbesimin, në mënyrë që të arrinte sërish nivelin e kërkuar për presionin dhe depërtimet në sulm, të cilat janë pjesë e rëndësishme e sistemit të tij taktik.
Në këto rrethana, Balde raportohet se ka kërkuar nga përfaqësuesit e tij të shqyrtojnë mundësinë e largimit gjatë afatit kalimtar të janarit, në mënyrë që të mos pengohet zhvillimi i tij në karrierë.
Atletico Madridi po e sheh këtë situatë si një mundësi për ta afruar mbrojtësin e Barcelonës dhe për të përforcuar krahun e majtë të mbrojtjes.
Sinjali – aty ku e vërteta flet para lajmit!
Burimi: Sinjali
