Policia e Kosovës ka zhvilluar një aksion në fshatin Dubovë e Madhe të Pejës, ku gjatë kontrollit në shtëpinë e një personi të dyshuar ka gjetur dhe sekuestruar një armë zjarri dhe rreth 300 gramë substancë të dyshuar narkotike.

Aksioni është realizuar të dielën, rreth orës 13:05, nga zyrtarët e Stacionit Policor në Pejë, me mbështetjen e njësitit të NJRSH-së, në kuadër të një pune hetimore-operative.

Përveç pistoletës së modifikuar, policia ka sekuestruar edhe një karikator, tre fishekë, një peshore dhe disa qese që dyshohet se përdoreshin për paketimin e narkotikëve.

Sipas njoftimit të Policisë, një pjesë e marihuanës ishte e ndarë në qese të vogla.

Personi i dyshuar është arrestuar dhe shoqëruar në stacion policor. Pas intervistimit, me vendim të prokurorit të shtetit, ai është dërguar në mbajtje për 48 orë.

Policia ka bërë të ditur se hetimet për këtë rast janë duke vazhduar në koordinim me Prokurorinë e Shtetit. /Insajderi.org/

Burimi: Insajderi