Sibel Halimi nuk kandidon për deputete: Do të vazhdojë angazhimin në LDK si anëtare e Kryesisë

Anëtarja e Kryesisë së LDK-së, Sibel Halimi, ka njoftuar se s’do të jetë kandidate e LDK-së për deputete në zgjedhjet e 7 qershorit.

Halimi ka thënë se do të vazhdojë angazhimin e saj në strukturat qendrore të LDK-së, duke qenë se i beson kreut të partisë dhe nivelit të politikbërjes që ai përfaqëson.

Postimi i plotë:

Të dashur qytetarë, votues të LDK-së dhe ju që më keni besuar në procesin e fundit zgjedhor përmes votës suaj.

Dua t’ju njoftoj se kam vendosur të mos kandidoj për deputete në zgjedhjet e 7 qershorit.

Këtë vendim e kam marrë sepse besoj se angazhimi politik nuk e merr kuptimin nga një kandidim personal, por nga besnikëria ndaj idesë që përfaqëson dhe përgjegjësisë ndaj vizionit që i duhet Kosovës sot.

Angazhimi im në LDK do të mbetet i njëjti. Do të vazhdoj të jem pjesë e strukturave qendrore të partisë dhe të kontribuoj me të njëjtin përkushtim, sepse besoj se Lumir Abdixhiku përfaqëson mundësinë për një nivel tjetër të politikëbërjes në Kosovë, një kulturë politike qytetare, moderne dhe larg populizmit e mashtrimit që për vite e kanë rrezikuar shtetin tonë dhe e kanë helmuar debatin publik.

Që nga dita e parë e angazhimit tim në LDK, kam besuar se Kosova ka nevojë për një drejtim liberal-demokratik, ku politika ndërtohet mbi ide, përgjegjësi dhe vlera që i rezistojnë kohës, e jo mbi zhurmën e momentit.

Prandaj, sot më shumë se kurrë, besoj se duhet të bashkëkohemi për një LDK që rikthen stabilitetin institucional dhe për një kryeministër të një kalibri tjetër, siç është Lumir Abdixhiku.

Me të njëjtin përkushtim do të vazhdoj të angazhohem që ideja e Lidhjes Demokratike të Kosovës të ngadhënjejë mbi politikën populiste që e ka lënë vendin pa vizion dhe pa rrugëdalje.

The post Sibel Halimi nuk kandidon për deputete: Do të vazhdojë angazhimin në LDK si anëtare e Kryesisë appeared first on Gazeta Express.