Shpëtohet një bjeshkatar gjerman në Luboten

Shërbimi i Kërkim-Shpëtimit Malor i Kosovës (ShKShMK) ka njoftuar se ka realizuar me sukses një operacion shpëtimi në zonën e majës së Lubotenit, ku një bjeshkatar gjerman ka pësuar lëndime të rënda pas një rrëshqitjeje në terren malor.

Sipas njoftimit, gjatë ditës së sotme numri kujdestar i ShKShMK-së ka pranuar një thirrje emergjente nga një grup bjeshkatarësh evropianë që po zhvillonin aktivitet në majën e Lubotenit.

Gjatë kthimit, shtetasi gjerman me inicialet P.J., 48 vjeç, ka rrëshqitur në faqen lindore të mbuluar me borë, duke rënë rreth 500 metra në një zonë të thepisur.

Si pasojë, ai ka pësuar lëndime të shumta trupore dhe ka mbetur i palëvizshëm.

“Menjëherë pas pranimit të informatës dhe koordinatave të vendngjarjes, ShKShMK ka mobilizuar dy skuadra të shpëtuesve malorë dhe ka filluar operacionin e kërkim-shpëtimit. Pas arritjes në vendin e ngjarjes, ekipet tona i kanë ofruar ndihmën e parë të lënduarit, kanë bërë imobilizimin e tij dhe kanë realizuar evakuimin në kushte të vështira malore. I lënduari është bartur me metoda specialistike të shpëtimit malor dhe më pas është transportuar me automjete 4×4 deri te pika e takimit me autoambulancën”, thuhet në njoftim.

Sipas ShKShMK-së, gjendja shëndetësore e bjeshkatarit raportohet stabile, pavarësisht lëndimeve të shumta të marra.

Operacioni u zhvillua në koordinim me Policinë e Kosovës, Ambasadën Gjermane, Shërbimin e Urgjencës në Ferizaj dhe institucionet tjera relevante.

“Të lënduarit i dëshirojmë shërim të shpejtë dhe rikthim sa më të shpejtë në gjendje të mirë shëndetësore”, theksohet në fund të njoftimit./teve1.info/

Nis një operacion shpëtimi në majen e Lubotenit, ShKShMK del me njoftim