Vdekja e papritur e këngëtarit të njohur grek Giorgos Mazonakis ka hapur një hetim për mënyrën se si u trajtua në orët e fundit të jetës.
Prokuroria ka nisur procedurat për të verifikuar rrethanat e vdekjes, ndërsa në fokus është edhe një mjeke e një klinike private ku këngëtari kishte kërkuar ndihmë pasi nuk ishte ndier mirë.
Mazonakis, 54 vjeç, u dërgua fillimisht në një klinikë private në zonën e Kolonakit, në Athinë.
Sipas raportimeve, gjendja e tij u përkeqësua gjatë qëndrimit aty dhe më pas u thirr ambulanca e EKAB-it për ta transportuar drejt spitalit “Elpis”.
Në spital, mjekët tentuan ta mbajnë në jetë, por këngëtari nuk mundi të rikuperohej. Sipas raportimeve të para, shkak i vdekjes ishte një arrest kardiak.
Hetimi tashmë synon të përcaktojë nëse trajtimi i marrë në klinikën private ishte i përshtatshëm për gjendjen e tij dhe nëse pati vonesa apo gabime në vlerësimin e situatës.
Për këtë arsye, autoritetet po mbledhin të dhënat mjekësore dhe informacionet mbi ndërhyrjet e kryera para transportimit të tij në spital.
Një tjetër element që po shqyrtohet është trajtimi që Mazonakis po merrte përpara se gjendja e tij të përkeqësohej.
Ky detaj pritet të jetë pjesë e verifikimeve mjekësore, për të kuptuar nëse kishte ndonjë lidhje mes trajtimit dhe problemeve që shfaqën në orët e fundit.
Mazonakis ishte një prej emrave më të njohur të muzikës greke dhe kishte një karrierë të gjatë në skenë. Vdekja e tij në moshën 54-vjeçare ka shkaktuar reagime të shumta në Greqi, ndërsa hetimi pritet të sqarojë nëse bëhet fjalë për një vdekje të papritur nga shkaqe natyrore apo nëse ka përgjegjësi të tjera që lidhen me trajtimin e tij mjekësor.
The post Shkoi për trajtim, nuk doli më i gjallë nga klinika – Nisin hetimet për vdekjen e Giorgos Mazonakis appeared first on Gazeta Express.
