Prokuroria Themelore në Mitrovicë ka kërkuar nga Gjykata Themelore në Mitrovicë caktimin e masës së paraburgimit ndaj tre personave me inicialet H.K., A.G. dhe E.G., të dyshuar për veprën penale “Pranimi i ryshfetit në sektorin privat”.
Sipas Prokurorisë, dyshohet se më 6 shkurt 2026, në objektin e Stacionit të Autobusëve në Mitrovicë, H.K., instruktor i një auto-shkolle, dhe A.G., ish-instruktor, kanë pranuar para në shuma të panjohura për t’ua mundësuar kandidatëve kalimin e testit teorik për patentë-shofer.
Sipas kërkesës për paraburgim, kandidatëve u janë vendosur pajisje elektronike, përfshirë kamera dhe kufje, përmes të cilave u janë treguar përgjigjet e sakta gjatë testit.
Prokuroria pretendon se një skemë e ngjashme është përsëritur edhe më 31 gusht 2026.
H.K. dhe E.G., në bashkëpunim me njëri-tjetrin, dyshohet se kanë pranuar para për t’ua mundësuar dy kandidatëve, A.R. dhe F.Z., kalimin e testit teorik.
Kandidatës A.R. dyshohet se i është dhënë një këmishë e zezë me pajisje elektronike të montuar dhe kufje, ndërsa kandidatit F.Z. një jelek i zi me pajisje elektronike dhe kufje.
Ata dyshohet se janë udhëzuar që përmes këtyre pajisjeve të pranonin përgjigjet e sakta. Seanca për caktimin e masës së paraburgimit do të mbahet në Gjykatën Themelore në Mitrovicë.
The post Kërkohet paraburgim për tre persona të dyshuar për ryshfet në provimet për patentë-shofer appeared first on Gazeta Express.
