Policia e Kosovës ka bërë të ditur se automjeti i raportuar si i vjedhur në fshatin Kufcë e Epërme të Novobërdës është gjetur, ndërsa hetimet kanë sqaruar se rasti nuk përmban elemente të veprës penale “vjedhje e rëndë”.
Sipas policisë, hetuesit e Njësitit të Hetimeve në Stacionin Policor të Novobërdës, në bashkëpunim me Prokurorinë e Shtetit, kanë ndërmarrë veprime intensive operative dhe hetimore pas raportimit të bërë më 17 qershor 2026.
“Si rezultat i veprimeve intensive, operative e hetimore në terren, në koordinim me Prokurorinë e Shtetit, janë siguruar prova të arsyeshme që tregojnë se rasti nuk paraqet elemente të veprës penale ‘vjedhje e rëndë’”, thuhet në njoftimin e policisë.
Nga verifikimet dhe intervistat e zhvilluara është konstatuar se raportimi kishte ndodhur për shkak të mungesës së informacioneve të plota nga ankuesja lidhur me përdorimin e automjetit Audi me targa vendore.
“Automjeti ishte marrë në shfrytëzim nga një familjar i saj në kohën kur ishte raportuar si i vjedhur”, ka bërë të ditur policia.
Autoritetet kanë njoftuar se gjatë hetimeve janë sqaruar të gjitha rrethanat relevante që çuan deri te raportimi i rastit, ndërsa automjeti është lokalizuar dhe rasti është trajtuar sipas procedurave ligjore.
