Sot, më 26 shtator 2026, në orën 18:00, Qendra “Gjenocidi në Kosovë- Plagë e Hapur” organizon përurimin e këngës “NE NUK HARROJMË!”, kushtuar viktimave të gjenocidit të kryer nga Serbia ndaj shqiptarëve gjatë luftës në Kosovë.
Kënga, e kompozuar nga Edmond Zhulali, me tekst të Fran Laskës, interpretohet nga Enkelejda Arifi, Ilir Shaqiri, Kastriot Tusha, Nikollë Nikprelaj dhe Selami Kolonja.
Drejtuesi i kësaj qendre, Bardhyl Mahmuti, ka njoftuar se në këtë ngjarje do të jenë të pranishëm edhe mysafirë nga vende të ndryshme të botës dhe emra që janë të lidhur me Kosovën.
Njoftimi i Bardhyl Mahmutit
INTELEKTUALË NGA DANIMARKA DHE SPANJA NË PËRURIM TË KËNGËS KUSHTUAR TË RËNËVE GJATË LUFTËS
Sot në ditën kur përkujtojmë krimin e gjenocidit në Abri të Epërme, Qendra “Gjenocidit në Kosovë-Plagë e Hapur” përuron këngën “NE NUK HARROJMË” kushtuar të gjithë të rënëve gjatë luftës çlirimtare.
Për këtë ngjarje nga Danimarka kanë udhëtuar intelektuali danez që mori pjesë vullnetarisht si luftëtar i Ushtrisë Çlirimtare të Kosovës dhe i dekoruar nga Presidenca e Kosovës për kontributin e tij në çlirimin e vendit tonë, Niels Henrik Hooge; historiani dhe ekspertin e çështjeve ballkanike, danezi Tue Magnussen dhe shkrimtarja nga Galicia e Spanjës, autore e librit “Mirupafshim në Kosovë”.
Në këtë manifestim do të merr pjesë edhe gazetari britanez, Vaughan Smith, i cili bëri filmimet gjatë krimit të gjenocidit në Prekaz, në lagjen e familjes Jashari.
Përveç nderimit që u bëjmë të rënëve, ky manifestim është apel për ngadhënjimin e drejtësisë së vërtetë: dënimin e kriminelëve të vërtetë që kryen gjenocid në Kosovë dhe lirimin e çlirimtarëve.
The post Përurimi i këngës në Prishtinë kushtuar viktimave të gjenocidit, të ftuar edhe intelektualë nga Danimarka e Spanja appeared first on Gazeta Express.
