Ministri i Jashtëm gjerman, Johann Wadephul, dhe homologu i tij rus, Sergey Lavrov, zhvilluan një takim në New York, në margjinat e Asamblesë së Përgjithshme të OKB-së. Ky ishte takimi i parë mes ministrave të Jashtëm të dy vendeve që nga nisja e pushtimit rus të Ukrainës në vitin 2022.
Biseda zgjati rreth 20 minuta dhe përfundoi me një shtrëngim duarsh. Sipas zëdhënëses së Ministrisë së Jashtme ruse, Maria Zakharova, takimi u kërkua nga pala gjermane. Ende nuk janë bërë të ditura temat konkrete që diskutuan dy ministrat.
Takimi vjen mes tensioneve të vazhdueshme për luftën në Ukrainë. Pak ditë më parë, Wadephul e akuzoi Rusinë për përshkallëzim të veprimeve kundër vendeve evropiane. Berlini e ka bërë Moskën përgjegjëse edhe për një tentativë sulmi me dron në aeroportin Leipzig/Halle; Rusia i ka mohuar akuzat.
Gjermania vazhdon t’i japë Ukrainës mbështetje financiare dhe ushtarake, ndërsa mbetet e paqartë nëse biseda në New York do të pasohet nga kontakte të tjera mes Berlinit dhe Moskës.
