Kryetari i Prishtinës, Përparim Rama, tha se kryeministri në detyrë, Albin Kurti, po i ndëshkon qytetarët e komunave në të cilat nuk udhëheq partia e tij, Lëvizja Vetëvendosje.
“Po flasim për paratë e qytetarëve që i paguajnë përmes tatimit dhe nuk mund t’i investohen në qytetet e tyre sepse iu ka bllokuar Albin Kurti për t’iu ndëshkuar politikisht sepse s’e keni votuar. Buxheti i komunës, o Albin, nuk është instrument i disiplinimit politik, a merr vesh? Nuk është diktaturë kjo, është Republikë. Poshtë diktatura!”, tha Rama gjatë fjalimit të tij në protestën e sotme të komunave të Kosovës kundër Qeverisë për ndarjet buxhetore.
Rama tha se në këtë protestë nuk kanë shkuar për interesa të tyre as të partive, por sepse “shteti duhet t’i shërbejë qytetarëve, jo t’i ndëshkojë ata”.
Gjithashtu, i pari i kryeqytetit tha se mesazhi i kësaj proteste është i qartë: “boll me bllokada”.
“Ne kemi luftuar gjatë që me pasë këtë shtet dhe nuk do ta lejojmë që ta shkatërrojë këtë shtet dikush me agjendë të dyshimtë si Albin Kurti”.
The post Përparim Rama: O Albin, a merr vesh, buxheti i komunës s’është instrument i disiplinimit politik – poshtë diktatura! appeared first on Gazeta Express.
