Tre persona kanë mbetur të lënduar pas një përleshjeje fizike që ka ndodhur mbrëmjen e së enjtes në rrugën “Papa Gjon Pali” në Prishtinë.
Lajmi është konfirmuar nga Policia e Kosovës, përmes zëdhënësit për Kryeqytetin Enis Pllana.
Ai tha se dy nga ta dyshohet se janë lënduar nga arma e zjarrit.
“Rreth orës 20:00, Policia ka pranuar informatën për një përleshje fizike në mes të disa personave në rrugën ‘Papa Gjon Pali’ në Prishtinë. Njësitet policore kanë dalë menjëherë në vendin e ngjarjes, ku sipas informacioneve fillestare tre persona kanë mbetur të lënduar, të cilët janë dërguar për trajtim mjekësor”, ka njoftuar Pllana.
