Oda e Hotelierisë dhe Turizmit të Kosovës (OHTK) dhe Organizata e Veteranëve të Luftës së UÇK-së (OVL-UÇK) kanë nënshkruar memorandum bashkëpunimi, me synim mbështetjen e veteranëve, invalidëve, familjeve të dëshmorëve dhe anëtarëve të tyre.
Marrëveshja parasheh mundësi për akomodim të delegacioneve, organizim të trajnimeve, konferencave dhe aktiviteteve të përbashkëta, ndërsa gjatë ceremonisë u diskutuan edhe sfidat me të cilat përballen kategoritë e dala nga lufta.
Kryetari i OHTK, Hysen Sogojeva, tha se qëllimi i këtij memorandumi është të ndihmojë OVL-UÇK-në qoftë në akomodim të të ftuarve të kësaj organizate, qoftë në trajnime të familjeve të veteranëve, invalidëve dhe dëshmorëve.
“Qëllimi i kësaj është që sadopak ne si Odë t’iu ndihmojmë në ato mundësitë që i takojnë kësaj veprimtarie. Ajo që ne drejtpërdrejtë mundemi edhe njëherë po e potencoj, delegacionet të cilat i keni nga jashtë, nuk keni nevojë me u marrë me akomodim, na tregoni sa veta, ne i sistemojmë, atë mundësi kemi mundësi, o në Prishtinë, në Gjakovë, në Prizren, në të gjitha regjionet që ne përfaqësojmë. Bile shtytja ka qenë prej bizneseve që me lidhë marrëveshje. Pastaj kemi familje të dëshmorëve, kemi veteranë, kemi invalidë, fëmijët e tyre për shembull, nëse kemi hapësirë ose keni kërkesa që të kryejnë trajnime të ndryshme sepse Oda organizon trajnime, bile prej shtatorit kemi me filluar trajnime nëpërmjet një projekti që e kemi me BE-në dhe aty kemi mundësi që pa diskutim fëmija i anëtarëve të juaj domethënë kësaj shoqate, ose veteranët ose invalidët apo edhe familjet e dëshmorëve të kyçen drejtpërdrejt që i lidhet me profesionin. Pastaj kemi mundësi konferenca të ndryshme të cilat lidhen bashkë, ndonjë tryezë pune e cila kishte me dhënë kontribut për ju”, tha ai.
Ndërsa, kryetari i OVL-UÇK, Hysni Gucati, u shpreh se ky memorandum nga ana e tyre u prit shumë mirë, pasiqë kontributi dhe çështja kombëtare janë e përbashkëta e të gjithëve.
“Ne memorandumin e kemi pritë shumë mirë, e kemi analizuar, jemi pajtuar bashkë me kryesinë e ngushtë. Kontributi edhe çështja kombëtare është e përbashkët e të gjithë qytetarëve shqiptarë. Ne jemi ata të cilët bashkarisht pa qytetarët edhe pa juve s’kishim mundur me triumfuar. Por sot shoqëria ka tashmë një obligim ndoshta edhe institucionet me u kujdes për këto kategori të luftës. Është e vërtetë që ne s’kemi kërkesa të mëdha as në qeveri, megjithëse me këtë qeveri dua t’i jap kritikat në start s’kemi raporte, as raporte bisedimesh, as raporte takimesh, as kërkesa deri më sot që 6 vite asnjë kërkesë nuk është realizuar nga kjo qeveri. Ne i kemi 67 me kancer, 24 janë në Turqi duke u trajtuar, një pjesë janë nëpër Europë, Francë, Gjermani, një pjesë në Kosovë. Që do të thotë as për ata kërkesat nuk janë realizuar që e kanë obligim me ligj. Është me ligj. Ministria e Mirëqenies Sociale dhe Ministria e Shëndetësisë e kanë obligim për veteranë, invalidë, fëmijët e dëshmorëve me i dërgu me u shëruar. Është me ligj”, tha ai. /EO
