Janë nxjerrë edhe dy trupat e fundit të zhytësve italianë që humbën jetën në incidentin më vdekjeprurës të zhytjes në historinë e Maldiveve, njoftoi të mërkurën një zëdhënës i qeverisë, duke konfirmuar se operacioni i kërkimit dhe rikuperimit ka përfunduar.
Zhytësit ishin pjesë e një grupi prej pesë personash që javën e kaluar hynë në një shpellë të thellë nënujore për eksplorim, pasi kishin marrë lejen e nevojshme për të studiuar koralet e buta në zonën Devana Kandu.
Autoritetet maldiviane po hetojnë disa shkaqe të mundshme të vdekjes së tyre, përfshirë dyshimet se grupi mund të ketë zbritur shumë më thellë nga sa ishte parashikuar.
“Identifikimi paraprak ka konfirmuar identitetin e shtetasve italianë dhe puna do të vazhdojë për konfirmim përmes analizave të ADN-së në bashkëpunim me Interpolin dhe partnerë të tjerë”, tha për Reuters zëdhënësi Mohamed Hussain Shareef.
“Ndërkohë, të gjithë trupat do të dërgohen në Itali”, shtoi ai, duke theksuar se hetimet do të vazhdojnë për të zbuluar saktësisht çfarë ka ndodhur.
Grupi drejtohej nga Monica Montefalcone, 51 vjeçe, profesore në Universitetin e Gjenovës dhe ekologe detare, e njohur për zhytjet e saj të shpeshta në ujërat maldiviane të Oqeanit Indian. Në grup ishte edhe vajza e saj.
Trupi i instruktorit të grupit u gjet të premten, ndërsa dy zhytës të tjerë u nxorën të martën, pasi në operacion u përfshi një ekip specialistësh nga Finlanda për të ndihmuar në kërkim.
The post Nxirren edhe dy trupat e fundit të zhytësve italianë që humbën jetën në Maldive appeared first on Gazeta Express.
