Një nxënëse nga Prizreni ka treguar shembull të ndershmërisë dhe përgjegjësisë qytetare, pasi ka gjetur një kuletë me para dhe dokumente personale dhe e ka dorëzuar në polici.
Sipas njoftimit të Policisë së Kosovës, rasti ka ndodhur më 25 gusht, rreth orës 20:45. Kuleta ishte gjetur në rrugën “Ekrem Rexha” nga nxënësja O.T., e lindur në vitin 2011, e cila së bashku me prindin e saj e dërgoi menjëherë në Stacionin Policor të Trafikut në Prizren.
Në kuletë kishte të holla dhe dokumente personale të pronarit. Policia, përmes dokumenteve identifikuese, arriti ta kontaktojë pronarin, i cili u paraqit në stacion dhe e mori kuletën.
Pronari falënderoi nxënësen për veprimin e saj të ndershëm, si dhe policinë për angazhimin në kthimin e sendeve të humbura.
Policia e Kosovës e ka cilësuar rastin si shembull të përgjegjësisë qytetare, ndershmërisë dhe bashkëpunimit të mirë ndërmjet qytetarëve dhe policisë.
The post Nxënësja gjen kuletën me para dhe dokumente, ia dorëzon policisë në Prizren appeared first on Gazeta Express.
