Yair Netanyahu, djali i madh i kryeministrit izraelit Benjamin Netanyahu, dyshohet se u bë objektiv i një plani iranian për vrasjen e tij gjatë qëndrimit në Florida. Lajmi u bë publik nga media amerikane Newsmax, duke iu referuar një burimi pranë agjencive amerikane të zbatimit të ligjit.
Informacioni u raportua vetëm pak ditë pasi Benjamin Netanyahu tha se Irani kishte bërë përpjekje për të vrarë njërin prej djemve të tij, por pa sqaruar nëse bëhej fjalë për Yair apo Avner.
Gjatë një interviste për Kanalin 14, kryeministri izraelit deklaroi: “Ka diçka këtu që është e pabesueshme. Irani ka shënjestruar një nga djemtë e mi. Irani u përpoq ta vriste atë”.
Burimi i Newsmax bëri të ditur se shënjestra ishte 35-vjeçari Yair Netanyahu, i cili kishte banuar në zonën e Hallandale Beach, afër Miamit.
Pasi u informua për kërcënimin, Yair Netanyahu, i cili ruhet nga një ekip izraelit sigurie, mori urdhër të largohej pa vonesë nga vendi ku po qëndronte. Sipas raportimeve, ai u nis pa marrë as sendet e tij personale dhe u kthye në Izrael, ku vazhdon të qëndrojë që prej asaj kohe.
Komploti ishte i njohur prej disa muajsh nga një pjesë e mediave, sipas Kanalit 12 të Izraelit, por censura ushtarake kishte penguar më parë publikimin e informacionit.
Yair është djali më i madh i Benjamin Netanyahut, ndërsa Avner, vëllai i tij, banon në Izrael. Ai ka kaluar një pjesë të konsiderueshme të kohës në zonën e Miamit dhe është profilizuar si një përkrahës i fuqishëm i politikës konservatore dhe i babait të tij.
Kryeministri izraelit e solli këtë rast si argument për domosdoshmërinë e masave mbrojtëse që u sigurohen anëtarëve të familjes së tij.
“Kjo është arsyeja pse kjo siguri nuk është luks”, u shpreh Netanyahu, duke paralajmëruar se ata që kanë në shënjestër familjen e tij mund t’ia arrijnë qëllimit në mungesë të mbrojtjes së përshtatshme.
Në korrik, Izraeli vendosi të zgjasë mbrojtjen e Shin Bet për bashkëshorten e Netanyahut, Sara, si dhe për djemtë Yair dhe Avner. Vendimi parashikon që masat e sigurisë për ta të vazhdojnë për pesë vjet, edhe në rast se Netanyahu nuk do të jetë më kryeministër.
Dyshimet për planin në Florida konsiderohen pjesë e një vargu kërcënimesh dhe komplotesh për vrasje, për të cilat autoritetet e Shteteve të Bashkuara kanë fajësuar Iranin.
Më herët, Departamenti amerikan i Drejtësisë ka ngritur akuza ndaj individëve me lidhje me Iranin për plane kundër zyrtarëve amerikanë. Prokurorët federalë akuzuan në vitin 2024 Farhad Shakerin, i dyshuar se vepronte për llogari të Iranit, për përfshirje në një komplot që synonte vrasjen e Donald Trump.
Një çështje tjetër u regjistrua në vitin 2022, kur autoritetet amerikane akuzuan Shahram Pourshafin, anëtar i Gardës Revolucionare iraniane, se dyshohej se kishte tentuar të organizonte vrasjen e ish-këshilltarit amerikan për Sigurinë Kombëtare, John Bolton. Prokurorët thanë se për eliminimin e Boltonit ai kishte ofruar 300 mijë dollarë.
Në listën e personave që dyshohet se janë kërcënuar nga Irani është përmendur gjithashtu Mike Pompeo, ish-Sekretari amerikan i Shtetit.
Tensionet, ndërkaq, kanë prekur edhe familjen e presidentit amerikan Donald Trump. Gjatë kësaj jave, televizioni shtetëror i Iranit transmetoi një material me përmbajtje kërcënuese, në të cilin përmendej Barron Trump, djali 20-vjeçar i presidentit.
Emisioni i Kanalit 3 të Iranit mbante titullin “Ku dhe si duhet ta vrasim Barron Trump?”. Gjatë programit pretendohej se ishin ndjekur lëvizjet e djalit të presidentit, ndërsa u paraqitën të dhëna të lidhura me universitetin, automjetet dhe organizimin e sigurisë së tij.
Shërbimi Sekret amerikan deklaroi se kishte dijeni për videon dhe konfirmoi se po hetonte kërcënimet që u drejtohen personave nën mbrojtjen e tij, pa bërë publike hollësi për masat e sigurisë.
Materiale kërcënuese kundër familjes Trump janë publikuar edhe më parë nga mediat iraniane. Në Sheshin Palestinë të Teheranit, muajin e kaluar, u vendosën postera me sloganin “Gjak për Gjak”, ku shfaqeshin Donald Trump dhe pjesëtarë të familjes së tij.
The post Newsmax: Irani dyshohet se planifikoi vrasjen e djalit të Netanyahut në Florida appeared first on Gazeta Express.
