Kryeministri i Shqipërisë, Edi Rama, zhvilloi sot një vizitë zyrtare në Paris, ku u prit nga Presidenti i Francës, Emmanuel Macron. Takimi mes dy liderëve u zhvillua në Pallatin Elysee në kuadër të një dreke pune, e cila zgjati më shumë se dy orë.
Vizita u realizua me ftesë të presidentit francez dhe vjen në kuadër të dialogut politik të nivelit të lartë ndërmjet Shqipërisë dhe Francës, me fokus forcimin e mëtejshëm të partneritetit strategjik mes dy vendeve.
Gjatë takimit u diskutua edhe për qasjen e re ndaj procesit të integrimit evropian, një nismë për të cilën kryeministri Rama ka qenë ndër mbështetësit më të zëshëm, si dhe për çështje të sigurisë dhe zhvillimet në prag të samitit të ardhshëm të NATO-s në Ankara.
Takimi i sotit është në vijimësi të takimeve ndërmjet dy liderëve, të cilët janë takuar zyrtarisht në Paris në prill 2024, si dhe në Tiranë në tetor 2023 dhe maj 2025, ndërkohë që janë zhvilluar rregullisht takime në formate të ndryshme multilaterale dhe kontakte telefonike.
Pas bisedimeve, Macroni reagoi në platformën “X”, ku vlerësoi marrëdhëniet mes Shqipërisë dhe Francës, duke theksuar bashkëpunimin në fusha si inovacioni, arsimi, kultura dhe turizmi, ndërsa rikonfirmoi mbështetjen e Francës për integrimin evropian të Shqipërisë dhe vazhdimin e reformave në rrugën drejt BE-së, shkruan TCh.
“Mirë se erdhe, i dashur Edi Rama. Marrëdhëniet mes Shqipërisë dhe Francës janë shumë të mira në inovacion, arsim, kulturë dhe turizëm tregojnë afërsinë tonë. Ne dëshirojmë t’i japim një shtysë të re këtij partneriteti, duke forcuar më tej bashkëpunimin ekonomik dhe atë në mbrojtje. Franca rikonfirmon mbështetjen e saj për integrimin evropian të Shqipërisë dhe për vazhdimin e reformave të nevojshme në rrugën drejt Bashkimit Evropian”, shkruan Macron.
