Zelanda e Re po zhvillon zgjedhjet e përgjithshme nën një prej kornizave më të rrepta ligjore për fushatat zgjedhore në botë, ku ndalohet pothuajse çdo aktivitet politik gjatë ditës së votimit.

Vendvotimet janë hapur pas një periudhe 12-ditore të votimit të parakohshëm, ndërsa pas përfundimit të procesit ka nisur numërimi i votave dhe publikimi i rezultateve preliminare.

Ligjet zgjedhore në Zelandën e Re ndalojnë fushatat politike nga mesnata deri në mbylljen e vendvotimeve.

Gjatë kësaj periudhe, partitë dhe kandidatët nuk mund të publikojnë mesazhe promovuese, ndërsa mediat nuk lejohen të raportojnë për kandidatët në mënyrë që mund të ndikojë te votuesit.

Gjithashtu, ndalohet shpërndarja e ushqimit dhe pijeve në një distancë prej 100 metrash nga vendvotimet, raporton washingtonpost.

Këto rregulla datojnë nga shekulli XIX dhe synojnë që procesi zgjedhor të zhvillohet pa presion, ndikim apo ndërhyrje politike në vendimmarrjen e qytetarëve.

Në zgjedhje po përballen dy blloqet kryesore politike. Kryeministri aktual, Christopher Luxon, udhëheq koalicionin e qendrës së djathtë, ndërsa ish-kryeministri Chris Hipkins është në krye të bllokut opozitar të qendrës së majtë.

Gara pritet të jetë e ngushtë, ndërsa sistemi zgjedhor proporcional e bën të vështirë që një parti e vetme të sigurojë shumicën parlamentare.

Qytetarët votojnë sipas sistemit proporcional të përzier (MMP), ku secili ka dy vota: një për kandidatin në zonën e tij zgjedhore dhe një për partinë politike. Pragu zgjedhor për përfaqësim në Parlament është pesë për qind.

Ndërkohë, një veçori e sistemit është edhe mundësia që pjesëtarët e popullit autokton maori të zgjedhin nëse duan të votojnë në listën e përgjithshme apo në njërën prej shtatë zonave të posaçme zgjedhore maori.

Rezultatet përfundimtare pritet të kërkojnë më shumë kohë, pasi duhet të numërohen edhe votat speciale, përfshirë ato të qytetarëve që kanë votuar nga jashtë vendit. /Telegrafi/