Një goditje e fuqishme tregtisë së paligjshme dhe kontrabandës i është dhënë gjatë kontrolleve rutinore në hyrje të Pikës së Kalimit Kufitar në Vërmicë. Zyrtarët e Doganës së Kosovës kanë parandaluar futjen e një sasie të madhe të mallit të padeklaruar, vlera e të cilit kap shifra të larta financiare.

Bëhet e ditur se fjala është për një kamion transportues, i cili megjithëse sipas dokumentacionit zyrtar kishte kryer procedurat doganore përmes deklaratës së pararritjes, ka përfunduar në kontroll shtesë pas përzgjedhjes nga parametrat e menaxhimit të riskut.

Me të mbërritur në pikën kufitare, zyrtari doganor ka kërkuar që automjeti t’i nënshtrohet kontrollit të detajuar me skaner, si dhe matjes zyrtare të peshës.

Si u zbulua mospërputhja?

Gjatë verifikimit në peshore janë evidentuar dallime të mëdha mes peshës së deklaruar në letra dhe peshës reale të mjetit. Diferenca shkoi në rreth 10 tonë mallra krejtësisht të padeklaruara.

Kjo mospërputhje ka bërë që zyrtarët të urdhërojnë menjëherë një kontroll më të detajuar të të gjithë ngarkesës.

Sipas vlerësimeve zyrtare, vlera e mallrave të padeklaruara – pa përfshirë detyrimet dhe taksat e importit – llogaritet të jetë rreth 154 mijë dollarë amerikanë.

Nisin procedurat ligjore

Rasti po vazhdon me procedurat administrative në përputhje me dispozitat e Kodit Nr. 08/L-247 për Doganat dhe Akcizën.

Nga Dogana e Kosovës kanë rikonfirmuar përkushtimin e tyre për kontrolle efikase dhe përdorimin e mekanizmave të riskut, me qëllim parandalimin e kontrabandës, luftimin e tregtisë së paligjshme dhe mbrojtjen e interesave financiare të vendit.

Burimi: Sinjali