Një mbrëmje e rëndë në lagjen Dardania të Prishtinës. Një shtetas austriak, vetëm 39 vjeç, është gjetur i pajetë brenda një banese, ndërsa rrethanat e vdekjes së tij mbeten të paqarta. Policia ka nisur hetimet, një dëshmitar është marrë në pyetje dhe dy miq të të ndjerit pritet të intervistohen për të sqaruar se çfarë ka ndodhur.
Gazeta Sinjali mëson se viktima është Sebastian Burtscher, rreth 39-vjeçar, shtetas i Austrisë, i cili u gjet pa shenja jete mbrëmjen e së premtes, më 6 nëntor 2026, në rrugën “Musine Kokalari” në Prishtinë.
Rreth orës 19:50, Emergjenca ka njoftuar Policinë për rastin. Njësitë policore kanë dalë menjëherë në vendngjarje, ku personeli mjekësor kishte konstatuar vdekjen e tij.
Në banesë kanë hyrë edhe hetuesit dhe krimteknikët, të cilët kanë ekzaminuar vendin ku u gjet 39-vjeçari.
Burimet e Sinjalit bëjnë me dije se një dëshmitar është intervistuar, ndërsa dy shtetas të huaj, miq të viktimës, pritet të japin deklaratat e tyre.
Ende nuk dihet çfarë i parapriu vdekjes së austriakut dhe në çfarë rrethanash ai u gjet pa shenja jete.
Me urdhër të Prokurorisë së Shtetit, trupi i pajetë është dërguar në Institutin e Mjekësisë Ligjore për autopsi, nga e cila pritet të mësohet shkaku i vdekjes.
Rasti është iniciuar si “Hetim mbi vdekjen”, ndërsa deri tani nuk ka të dhëna të konfirmuara për përfshirje të ndonjë veprimi kriminal.
Sinjali – aty ku e vërteta flet para lajmit!
Burimi: Sinjali
