Shërbimi Korrektues i Kosovës ka parandaluar futjen e kontrabandës në një institucion korrektues, ku gjatë kontrolleve të sigurisë është gjetur një pako me 87 gramë lëndë të dyshuar narkotike, përfshirë edhe mbështjellësin.

Sipas njoftimit të SHKK-së, pakoja është zbuluar rreth orës 02:35, ndërsa dyshohet se është hedhur nga jashtë perimetrit të institucionit.

“Zyrtarët korrektues kanë gjetur një pako të dyshimtë brenda perimetrit të institucionit, për të cilën dyshohet se është hedhur nga jashtë. Pas kontrollit dhe matjes, pesha e lëndës së dyshuar narkotike, së bashku me mbështjellësin, ka rezultuar 87 gramë”, thuhet në njoftim.

Lidhur me rastin është njoftuar Policia e Kosovës, e cila do të merret me trajtimin e mëtejshëm sipas procedurave përkatëse.

SHKK-ja ka theksuar se do të vazhdojë kontrollet dhe zbatimin e masave të sigurisë për të parandaluar futjen e kontrabandës në institucionet korrektuese.

Burimi: Dukagjini