Milan Radoiçiqi, i kërkuar nga Interpoli për sulmin e armatosur në Banjskë, është shfaqur në një tubim zgjedhor të Partisë Progresive Serbe, në Kragujevc, përkrah Danilo Vuçiqit, djalit të ish-presidentit serb, Aleksandar Vuçiq.
Lajmi është raportuar nga mediumi serb N1, i cili ka publikuar pamje ku shihet Radoiçiqi në tubimin zgjedhor.
Radoiçiqi akuzohet nga Prokuroria Speciale e Kosovës si udhëheqës dhe organizator i sulmit të armatosur në Banjskë, më 24 shtator 2023, ku u vra rreshteri i Policisë së Kosovës, Afrim Bunjaku. Në aktakuzë për këtë rast përfshihen gjithsej 45 persona.
Ndaj tij rëndon edhe një aktakuzë tjetër, e ngritur në gusht të vitit 2026, lidhur me vrasjen e 107 civilëve shqiptarë në komunën e Gjakovës gjatë luftës së viteve 1998–1999. Sipas dosjes së Prokurorisë Speciale, Radoiçiqi dyshohet se ishte pjesë e forcave policore dhe ushtarake serbe të përfshira në dëbimin, plaçkitjen dhe vrasjen e civilëve shqiptarë.
Për këtë rast, Prokuroria ka kërkuar që ai të gjykohet në mungesë.
Radoiçiqi ka qenë edhe nënkryetar i Listës Serbe, pozitë që e mbajti pas vrasjes së politikanit serb nga Kosova, Oliver Ivanoviq, në vitin 2018.
Sinjali – aty ku e vërteta flet para lajmit!
The post Radoiçiqi shfaqet në fushatë zgjedhore përkrah djalit të Vuçiqit appeared first on Sinjali.
Burimi: Sinjali
