Stuhitë e fuqishme që goditën jugun e Italisë gjatë natës shkaktuan përmbytje të mëdha, dëme materiale dhe bllokim të disa rrugëve, ndërsa disa automjete përfunduan mes shkëmbinjve pranë detit.
Situata më e rëndë u regjistrua në ishullin Lipari, në provincën e Mesinës, dhe në Melito Porto Salvo, në zonën e Reggio Calabrias.
Në portin Sottomonastero të Liparit, disa makina mbetën të bllokuara nga uji, ndërsa rrugët u mbuluan me baltë dhe mbeturina. Për shkak të përmbytjeve, zjarrfikësit ndërhynë për të ndihmuar edhe drejtuesit e automjeteve të bllokuara.
Ndërkohë, në Melito Porto Salvo, ujërat përmbytën rrugët, disa automjete përfunduan në shkëmbinjtë pranë detit dhe një mur u shemb. Kryebashkiaku Tito Nastasi e përshkroi situatën si një “bombë uji”, duke bërë të ditur se dëmet ende nuk ishin vlerësuar plotësisht dhe se kishte kërkuar shpalljen e gjendjes së fatkeqësisë natyrore.
Autoritetet u kanë bërë thirrje banorëve të kufizojnë lëvizjet, ndërsa ekipet e Mbrojtjes Civile, zjarrfikësit dhe policia po monitorojnë zonat e prekura.
Dëme materiale u raportuan edhe në provincën e Tarantos, ku erërat e forta rrëzuan struktura ndriçimi për festimet e Shën Mediçit në zonën e Savës. Strukturat ranë mbi automjete të parkuara, por nuk u raportuan persona të lënduar.
Sinjali – aty ku e vërteta flet para lajmit!
The post Moti ekstrem godet Italinë, ujërat marrin veturat dhe përmbytin qytetet – pamje dramatike appeared first on Sinjali.
Burimi: Sinjali
