Kancelari gjerman Friedrich Merz ka kushtëzuar arritjen e marrëveshjes për buxhetin e ardhshëm të Bashkimit Evropian me miratimin e një ndihme shtesë prej 45 miliardë eurosh për Ukrainën, duke ndërlidhur dy çështje që kanë shkaktuar ndarje mes shteteve anëtare, raporton Euronews.

Ukraina përballet me një mungesë prej 70 miliardë eurosh në buxhetin e vitit 2027, si pasojë e sulmeve të vazhdueshme ajrore të Rusisë. BE-ja ka premtuar të mbulojë rreth dy të tretat e kësaj shume, përmes një mekanizmi që ende nuk është përcaktuar.

“Një angazhim i përbashkët që të gjithë ne, pa përjashtim, të kontribuojmë në mënyrë të drejtë për mbulimin e kësaj mungese është një parakusht thelbësor për zgjidhjen e kësaj çështjeje dhe për diskutimin e çdo çështjeje tjetër, veçanërisht atyre me ndikim financiar”, ka thënë Merz në një letër drejtuar presidentit të Këshillit Evropian, António Costa.

Sipas Euronews, kancelari gjerman ka kërkuar që negociatat për buxhetin shtatëvjeçar të BE-së të garantojnë financim të qëndrueshëm për Ukrainën nga viti 2028, duke përfshirë edhe detyrimet e interesit nga kredia ekzistuese prej 90 miliardë eurosh.

Merz ka kërkuar gjithashtu që financimi i Ukrainës të trajtohet me prioritet në samitin joformal të kësaj jave në Dublin.

“Mbështetja e Ukrainës është çështje e sigurisë sonë të pandashme evropiane dhe po kështu duhet të jetë edhe ndarja e barrës për këtë mbështetje”, ka shkruar ai.

Gjermania, Danimarka, Finlanda, Holanda dhe Suedia kërkojnë që financimi i Ukrainës dhe buxheti i BE-së të trajtohen në një paketë të vetme.

Ndërkohë, Hungaria, Sllovakia dhe Republika Çeke kanë sinjalizuar se do të përjashtohen sërish nga huamarrja e përbashkët për Ukrainën, ndërsa edhe Bullgaria pritet të ndjekë të njëjtën rrugë.

Kryeministri sllovak Robert Fico ka paralajmëruar se ndërlidhja e këtyre dy çështjeve do të ishte “shumë e rrezikshme”.

Burimi: RTKLive