Ndryshimet politike në Serbi nuk duhet të krijojnë iluzionin se Kosova do ta ketë më të lehtë procesin e dialogut dhe të negociatave me Beogradin. Përkundrazi, nëse analizojmë përbërjen profesionale dhe akademike të Listës Studentore, mund të konstatojmë se Kosova mund të përballet me një elitë të re politike, me nivel të lartë përgatitjeje profesionale dhe shkencore.

Shkruan: Kushtrim Kadriu

Duke hulumtuar strukturën e 140 kandidatëve të parë të Listës Studentore, vërehet një përfaqësim i konsiderueshëm i profesionistëve nga fusha të ndryshme. Sipas klasifikimit të profesioneve të deklaruara, 64 kandidatë, ose 45.7%, vijnë nga arsimi dhe akademia; 17, ose 12.1%, nga shëndetësia, farmacia dhe veterinaria; 12, ose 8.6%, nga fusha juridike; 9, ose 6.4%, nga inxhinieria, arkitektura dhe teknologjia; ndërsa 7, ose 5%, nga ekonomia, menaxhimi dhe shkencat politike. Pjesa tjetër përfshin profesionistë të kulturës, shkencave natyrore, bujqësisë, sportit dhe fushave të tjera.

Këto statistika dëshmojnë një përqendrim të madh të profesionistëve, veçanërisht të akademikëve, në strukturën e kësaj liste. Megjithatë, përgatitja akademike nuk duhet ngatërruar me orientimin politik. Një profesor universitar, një jurist apo një ekonomist me përgatitje të lartë shkencore nuk është domosdoshmërisht më i gatshëm të bëjë kompromise politike, veçanërisht kur bëhet fjalë për çështje të ndjeshme si marrëdhëniet ndërmjet Kosovës dhe Serbisë.

Pikërisht këtu qëndron shqetësimi im. Në Kosovë mund të krijohet përshtypja se ndryshimi i elitës politike në Serbi do të sjellë automatikisht një qasje më konstruktive ndaj Kosovës. Por një supozim i tillë do të ishte i nxituar. Ndryshimi i figurave politike nuk nënkupton domosdoshmërisht ndryshimin e qëndrimeve shtetërore, veçanërisht në raport me pavarësinë dhe sovranitetin e Kosovës.

Madje, një ekip politik me përgatitje të lartë profesionale mund të jetë më sistematik në argumentim, më i organizuar në procesin negociator dhe më i aftë në përdorimin e instrumenteve juridike, ekonomike dhe diplomatike për mbrojtjen e interesave të veta shtetërore. Kjo nuk do të thotë se një qasje e tillë është e pashmangshme, por është një mundësi që Kosova duhet ta analizojë me seriozitet.

Prandaj, për Kosovën nuk duhet të jetë vendimtare vetëm se kush e udhëheq Serbinë, por cilat janë qëndrimet konkrete të atyre që marrin përgjegjësinë për qeverisjen e saj. Përpara se të krijohen pritshmëri pozitive, duhet të analizohen programi politik, qëndrimet ndaj Kosovës dhe gatishmëria reale për normalizimin e marrëdhënieve.

Kosova nuk duhet ta ngatërrojë ndryshimin politik në Serbi me ndryshimin e politikës së Serbisë ndaj Kosovës. Përballë një elite potencialisht të mirëpërgatitur, përgjigjja më e mirë është forcimi i kapaciteteve tona profesionale, diplomatike dhe negociatore. Sepse në diplomaci nuk mjafton vetëm të kesh të drejtë; duhet të kesh edhe përgatitjen, argumentet dhe strategjinë për ta mbrojtur atë.

Burimi: Insajderi